Félag íslenskra hjúkrunarfræðinga

Sögusýning í tilefni af 80 ára afmæli Landspítala opnuð í dag//

Opnuð verður á Landspítalanum í dag sögusýning í tilefni af 80 ára afmæli sjúkrahússins. Ólafur Ragnar Grímsson , forseti Íslands, opnar sýninguna í dag, þriðjudaginn 15. júní, kl. 13:30.


Alexandrína, drottning Danmerkur og Íslands, lagði hornstein að byggingu Landspítala við hátíðlega athöfn 15. júní 1926. Fyrsti sjúklingurinn var síðan lagður inn á spítalann 20. desember 1930. Á sýningunni er leitast við að varpa ljósi á aðdraganda byggingar Landspítala, fyrstu starfsárin og á listaverkaeign spítalans.

Sýningin skiptist í sex hluta sem er á göngum og í stigahúsi upp frá aðalinngangi í Kringlunni. Meðal þess sem sjá má á sýningunni eru gömul lækningaáhöld og ljósmyndir úr starfseminni frá 1933. Við opnun sögusýningarinnar verður afhjúpuð mynd af Vigdísi Magnúsdóttur fyrrverandi hjúkrunarforstjóra og forstjóra Landspítala, sem lést á síðasta ári.