Félag íslenskra hjúkrunarfræðinga

Framsöguerindin frá dagskrá 12. maí eru komin inn á heimasíðuna.//

Framsöguerindin frá dagskrá 12. maí eru komin inn á heimasíðuna.

Alþjóðadagur  hjúkrunarfræðinga 12. maí 2004, var helgaður baráttunni gegn fátækt í heiminum. Yfirskrift dagsins var: Hjúkrunarfræðingar - Vinna með fátækum - Gegn fátækt

Félag íslenskra hjúkrunarfræðinga  bauð upp á dagskrá á Grand Hótel, að kvöldi 12. maí og var dagskráin helguð fátækt á Íslandi. Formaður félagsins, Elsa B. Friðfinnsdóttir flutti ávarp og síðan fluttu Margrét Guðmundsdóttir, sagnfræðingur og Harpa Njáls, félagsfræðingur erindi. Harpa fjallaði um fátækt á Íslandi í dag og Margrét sagði frá hjúkrunarfélaginu Líkn og starfi hjúkrunarkvenna meðal fátækra og sjúkra höfuðborgarbúa á fyrri hluta síðustu aldar. Erindin er að finna inn á heimasíðuna undir Afmælisár í næstu viku.

Léttsveit Reykjavíkur undir stjórn Jóhönnu V. Þórhallsdóttur söng nokkur lög við góðar undirtektir fundarmanna. Lyfti það enn frekar stemmingunni að sjá hversu margir hjúkrunarfræðingar voru í hópnum.

Fundurinn var vel sóttur. Sérstaklega var gaman að fá á fundinn fjölmenna hópa hjúkrunarfræðinga úr Vesturlandsdeild og Suðurlandsdeild.

Að lokum samþykkti fundurinn ályktun þar sem skorað var á stjórnvöld að bregðast við fátækt á Íslandi og gera þær ráðstafanir sem þarf til að allir þegnar þessa lands megi búa við mannsæmandi kjör, gott heilsufar og jafnan aðgang að heilbrigðisþjónustunni, þjóðinni til heilla.