Félag íslenskra hjúkrunarfræðinga

Vinnuvistfræðifélag Íslands veitir verðlaun í apríl n.k//

Stúdentaverðlaun Vinnís

Vinnuvistfræðifélag Íslands veitir verðlaun í apríl n.k. til háskólanema fyrir verkefni sem hefur vinnuvistfræðilegt gildi og þykir skara fram úr öðrum á því sviði. Þetta er í annað sinn sem verðlaunin verða veitt á Íslandi en sambærilegar viðurkenningar hafa verið veittar á Norðurlöndum á undanförnum árum. Sjá umfjöllun frá árinu 2007 um íslensku viðurkenninguna hér.

Allir nemendur við íslenska háskóla og Íslendingar í háskólanámi erlendis geta tekið þátt í samkeppninni.

Fyrstu verðlaun eru peningaverðlaun, að verðmæti kr. 100.000 kr, en veittar verða viðurkenningar fyrir verkefni sem lenda í 2. og 3. sæti. Verðlaunin gefa vinningshafa tækifæri til að taka þátt í samkeppni um norræn stúdentaverðlaun er verða veitt á norrænu vinnuvistfræði­ráðstefnunni, NES 2009 sem haldin verður í Helsingør í Danmörku 22.–24. júní 2009. Sjá nánar um ráðstefnuna  http://www.nes2009.dk/

Nefnd skipuð einum fulltrúa háskólasamfélagsins, einum fulltrúa atvinnulífsins og einum fulltrúa stjórnar Vinnís velur vinningshafa úr röðum umsækjenda.

Ef vinningshafi uppfyllir viðmið, sem stjórn norrænu vinnuvistfræðisamtakanna NES setja fyrir þátttöku í samkeppni um NES stúdentaverðlaunin, mun viðkomandi verða fulltrúi Vinnís í þeirri samkeppni. Hann mun sækja NES ráðstefnuna í boði Vinnís og kynna verkefni sitt.

Umsókn með 400–800 orða útdrætti skal senda inn fyrir 23. mars 2009 til formanns Vinnís, Berglindar Helgadóttur, (berglh@landspitali.is) sem veitir einnig nánari upplýsingar.

Skilgreining á vinnuvistfræði

Vinnuvistfræði er fræðigrein sem fjallar um það að skilja samspil manns og umhverfis. Í vinnuvistfræði er leitast við að samþætta kenningar, þekkingu, reynslu og aðferðir margra fræðigreina með það að markmiði að stuðla að sem bestri líðan fólks og stöðugum endurbótum. Í vinnuvistfræði er lögð áhersla á að móta og meta störf, verkefni, vörur, umhverfi og aðferðir til aðlögunar að þörfum og getu fólks. Orðin ergon (vinna) og nomos (lögmál) koma úr grísku og vísa til fræðigreinarinnar um vinnuna. Í vinnuvistfræði er nálgunin kerfisbundin og heildstæð þar sem tekið er tillit til líkamlegra, vitsmunalegra, félagslegra, skipulagslegra og annarra umhverfisþátta. Innan fræðigreinarinnar er sérhæfing sem stuðlar að dýpri þekkingu á einstaka þáttum: Líkamlegum,huglægum og skipulagslegum.

Ekki hika við að hafa samband og kanna hvort ritgerðin þín henti fyrir þetta verkefni.

Með kveðju

f.h. stjórnar Vinnuvistfræðifélags Íslands www.vinnis.is

Berlind Helgadóttir, formaður

berglh@landspitali.is