Hjukrun.is-print-version

Ábending/Fyrirspurn

Á virkum dögum er fyrirspurnum að jafnaði svarað innan 48 tíma eftir að þær berast.

Sviðstjóri kjara- og réttindasviðs lætur af störfum

RSSfréttir
13. febrúar 2015

Cecilie B.H. Björgvinsdóttir, sviðstjóri kjara- og réttindasviðs Fíh hefur sagt starfi sínu lausu. Hún mun taka við stöðu mannauðsstjóra á Heilbrigðisstofnun Suðurlands (HSU). Cecilie hefur starfað af miklum heilindum fyrir hjúkrunarfræðinga á áttunda ár og þökkum við henni vel unnin störf í þágu hjúkrunarfræðinga og óskum henni velfarnaðar í nýju starfi. Cecilie mun láta af störfum þann 28. febrúar. 

Í ljósi þeirra aðstæðna sem nú eru í samningsumhverfi á vinnumarkaði og þess að samningaviðræður eru þegar hafnar hefur framkvæmdaráð í samráði við stjórn Fíh ákveðið að skipa Gunnar Helgason, gjaldkera stjórnar, í stöðu sviðstjóra kjara- og réttindasviðs til 1. september. Gunnar hefur margra ára reynslu af setu í stjórn Fíh auk þess sem hann hefur átt sæti í samninganefnd félagsins s.l. ár. Hann hefur því víðtæka þekkingu á kjaramálum, samningsgerð, réttindum og skyldum hjúkrunarfræðinga, tölulegri úrvinnslu auk þess sem hann hefur mikla reynslu af verkefnastjórnun á LSH. Eins hefur Gunnar unnið að ýmsum verkefnum fyrir félagið. Gunnar hefur lokið meistaraprófi í hjúkrun frá Háskóla Íslands.

Skipun Gunnars í starfið er til 1. september 2015 en staðan verður auglýst til umsóknar þegar kjarasamningagerð við alla viðsemjendur Fíh er lokið. Dragist samningar á langinn áskilur framkvæmdaráð sér rétt til að framlengja ráðningu hans þar til kjarasamningagerð er lokið.

Gunnar mun fara í leyfi frá stjórn félagsins á meðan hann gegnir starfi sviðstjóra. Hann mun einnig fá leyfi sem gjaldkeri stjórnar og þar af leiðandi ganga úr framkvæmdarráði félagsins tímabundið. Stjórn mun á næsta fundi sínum kjósa nýjan gjaldkera til afleysinga.

Við bjóðum Gunnar velkomin til starfa.

 

Með vinsemd og virðingu,

Ólafur G. Skúlason, formaður Fíh

Til baka

Þetta vefsvæði notar vafrakökur.

Lesa skilmála