Hjukrun.is-print-version

Ábending/Fyrirspurn

Á virkum dögum er fyrirspurnum að jafnaði svarað innan 48 tíma eftir að þær berast.

Heillaðist strax af því að vinna á Vökudeild Barnaspítalans

RSSfréttir
7. febrúar 2019

Rakel Björg Jónsdóttir hóf að vinna á Barnaspítalanum á námsárunum í hjúkrunarfræði og hefur unnið þar allar götur síðar. Rakel er sérfræðingur í nýburahjúkrun og hefur starfað á nýburagjörgæsludeild Vökudeild Barnaspítala Hringsins frá því að hún útskrifaðist úr hjúkrun árið 1996. Hún leggur nú stund á doktorsnám í hjúkrun. 

Það var áhugi hennar á því að vinna við eitthvað tengt veikum börnum sem varð til þess að hjúkrunarfræði varð fyrir valinu. „Ég vissi svo sem ekki mikið um hjúkrun þegar ég byrjaði í náminu en varð mjög fljótt ánægð með val mitt. Ég fór að vinna á barnadeildinni í sumarvinnu eftir annað árið og hef eiginlega ekki farið út af Barnaspítalanum síðan þá.“ Hún segist hafa ráðið sig með miklum semingi á Vökudeildina strax eftir útskrift af því að það vantaði ekki á barnadeildina en hún varð strax heilluð og er það enn.

Áhugamálið varð að vinnu

Rakel hefur mikinn áhuga á faglegum málefnum og sækir gjarna ráðstefnur og námskeið til að efla sig í faginu. „Á náttborðinu mínu eru alltaf nokkrar fræðigreinar og bækur en eftir að ég fór í doktorsnám haustið 2017 er áhugamálið orðið að vinnu og nær allur frítími vel nýttur,“ segir hún og bætir við: „Annars þegar maður á þrjú börn sem eru á fullu í íþróttum þá fer frítíminn ansi mikið í að standa á hliðarlínunni á fótbolta og handboltamótum,“ en Rakel er í sambúð og á 12 ára tvíbura, stelpu og strák, og 8 ára stelpu og nýjustu fjölskyldumeðlimirnir eru tveir kettlingar.

„Það er næstum alltaf gaman í vinnunni, að styðja og leiðbeina foreldrum sem eru að takast á við áskoranir í foreldrahlutverkinu er mjög gefandi“
Hún segir það skemmtilegasta við starfið vera endalausar áskoranir og tækifæri til að þróa sig og þroska sem fag- og fræðimaður. „Fjölbreytnin er svo mikil,“ segir hún. „Það er næstum alltaf gaman í vinnunni, að styðja og leiðbeina foreldrum sem eru að takast á við áskoranir í foreldrahlutverkinu er mjög gefandi. Síðan er það samstarfsfólkið, starfsfólk Vökudeildar eru upp til hópa einstakar manneskjur og frábært að fá að eyða vinnudeginum með þeim.“
Til baka

Þetta vefsvæði notar vafrakökur.

Lesa skilmála