Hjukrun.is-print-version

Ábending/Fyrirspurn

Á virkum dögum er fyrirspurnum að jafnaði svarað innan 48 tíma eftir að þær berast.

Námskeið: Áhugahvetjandi samtal

RSSgreinasafn
18. ágúst 2017

Grunnnámskeið fyrir hjúkrunarfræðinga verður haldið dagana 5., 6. og 13. október 2017. Námskeiðið hefur hlotið góða dóma og uppselt hefur verið á síðustu námskeið.

Áhugahvetjandi samtal (e. Motivational Interviewing) er notað bæði með fullorðnum og unglingum sem gætu verið í þörf fyrir breytingar á lífsstíl eða hegðun. Sumir hafa hugsanlega ekki komið auga á þörf fyrir breytingar eða eru alfarið á móti þeim, á meðan aðrir hafa íhugað breytingar en eru á báðum áttum. Aðferðin sem hér er um að ræða miðar að því að virkja vilja skjólstæðings til jákvæðra breytinga á lífsstíl og hegðun. Starfsmenn efla færni sína í að mæta skjólstæðingi þar sem hann er staddur, laða fram og ýta undir hugsanir og tillögur hans sjálfs um jákvæðar breytingar. Aðferðin byggist á skilningi starfsmannsins á ferli samtalsins og vilja til samvinnu.

Fagfólk sem tileinkar sér þessa aðferð eflir færni sína í að aðstoða fólk í að breyta hegðun. Mikilvægt einkenni áhugahvetjandi samtals er einnig að forðast ákveðnar leiðir í samtalinu, eins og siðapredikanir, sem eru til þess fallnar að ýta undir mótþróa og draga úr vilja til breytinga. Borin er virðing fyrir sjálfstæði skjólstæðingsins, rétti hans og getu til að taka eigin ákvarðanir innan viðeigandi marka hverju sinni.

Reynsla þeirra sem hafa lært og notað áhugahvetjandi samtal er að vinnan verður skemmtilegri og árangursríkari, sem getur dregið úr líkum á kulnun í starfi. Rannsóknir hafa leitt í ljós að umrædd nálgun ber árangur bæði í bráðaþjónustu og meðferðarvinnu.
Á námskeiðinu er farið yfir fræðilegan bakgrunn, grunnhugmyndir og áhersla er lögð á æfingar. Fjallað er um kóðun á samtalsbútum og greiningarkerfið MITI kynnt, en það kerfi tryggir gæði í framkvæmdinni og að aðferðin sé notuð rétt. Þátttakendur skila inn einum 20 mín. löngum samtalsbút (í starfrænu formi) til greiningar á meðan á námskeiðinu stendur.

Umsjón með námskeiðinu hefur Dr. Helga Sif Friðjónsdóttir. Leiðbeinendur ásamt henni eru dr. Sveinbjörn Kristjánsson,  Héðinn Svarfdal Björnsson, MA og  Soffía Eiríksdóttir, MPH

Námskeiðið verður haldið í  húsnæði Félags íslenskra hjúkrunarfræðinga, Suðurlandsbraut 22, 108 Reykjavík dagana 5. og 6. október 2017 frá 9:00-16:00 og 13. október 2017 kl. 9:00-13:00.

Hámarksfjöldi fjöldi þátttakenda er 20. Þátttökugjald er  50.000 kr. Innifalið í  þátttökugjaldi eru námskeiðsgögn og kaffi/te í hléum.

Skráning á námskeiðið hefst 4. september n.k. 

Til baka