Hjukrun.is-print-version

Heilsa og vellíðan fyrir alla - horft til framtíðar

24. janúar 2022

Þrettánda Norræna lýðheilsuráðstefnan verður haldin á Íslandi í lok júnímánaðar 2022. Ráðstefnan verður haldin í Hörpu, ráðstefnu- og tónleikahúsi okkar Íslendinga. Upphaflega átti að halda ráðstefnuna sumarið 2020 en vegna heimsfaraldurs var henni frestað.

Yfirskrift ráðstefnunnar að þessu sinni er „Heilsa og vellíðan fyrir alla – horft til framtíðar“ .

Ráðstefnan er vettvangur þar sem Norðurlöndin koma saman, deila þekkingu og reynslu auk þess að efla fagleg tengsl og samstarf á sviði lýðheilsumála. Norðurlöndin eiga margt sameiginlegt hvað varðar heilbrigðis-, velferðar- og menntakerfi og því eru fjölmörg tækifæri til að læra hvert af öðru. Á ráðstefnunni gefst gott tækifæri til að bera saman aðferðir og kerfi í lýðheilsustarfi milli landa. Á ráðstefnunni verður lögð áhersla á góð dæmi og aðferðir sem hafa borið árangur innan Norðurlandanna. Stefnt er að því að þátttakendur geti bætt í verkfærakistu sína tækjum og tólum til að vinna að lýðheilsumálum. Þess verður gætt að ráðstefnan sjálf verði heilsueflandi.

Þrjár höfuðáherslur ráðstefnunnar verða á: Áhrifaþætti heilsu og vellíðanar, stefnumótun lýðheilsu og gagnadrifið lýðheilsustarf. Þá verður einnig fjallað um heimsfaraldurinn COVID-19 og hvernig lýðheilsustarf hefur skipt sköpum í viðbrögðum og fyrirbyggjandi vinnu til að takast á við afleiðingar hans. 

Ráðstefnan mun renna saman við tíundu Evrópuráðstefnuna um jákvæða sálfræði með einum sameiginlegum ráðstefnudegi. Enn fremur munu þátttakendur eiga kost á því að skrá sig á báðar ráðstefnurnar og fá sérstakan afslátt. Það eru mörg tækifæri sem felast í því að tengja saman svið lýðheilsu og jákvæðrar sálfræði. Vonast er til að þessar ráðstefnur munu byggja sterkari brýr milli þessara fræðasviða. Bæði svið vinna að því að auka vellíðan og lífsgæði með faglegum hætti sem byggja á vísindalegum grunni.

Tekið er á móti ágripum til 31. janúar 2022. Við hvetjum fólk til að senda inn ágrip hvort heldur sem það starfar á vettvangi lýðheilsu, við stefnumótun eða innan rannsóknargeirans. Þau sem eiga samþykkt ágrip frá því að ráðstefnan átti að vera haldin 2020 þurfa að setja þá inn aftur í nýtt skráningarkerfi og haka við að ágripið þeirra hafi áður verið samþykkt.

Skráning á ráðstefnuna er hafin.

Frekari upplýsingar má finna á heimasíðu ráðstefnunnar www.nphc2020.com og á Facebook síðu ráðstefnunnar.
Til bakaAðrir viðburðir

Þetta vefsvæði notar vafrakökur.

Lesa skilmála