Hjukrun.is-print-version

Ráðgjöf um getnaðarvarnir (HJÚ157F)

3. janúar 2023

Vorið 2023 verður á vegum Hjúkrunar- og ljósmóðurfræðideildar Háskóla Íslands boðið upp á námskeið til að undirbúa starfandi hjúkrunarfræðinga og ljósmæður að veita ráðgjöf um getnaðarvarnir og ávísa hormónagetnaðarvörnum. Hjúkrunarfræðingar þurfa að hafa lokið eða stunda meistaranám í heilsugæslu.

Námskeiðið heitir HJÚ157F, Ráðgjöf um getnaðarvarnir- lyfjaávísanir og er 6 ECTS einingar, bæði fræðilegt og klínískt. Fræðilegi hlutinn er kenndur í einni lotu sem byrjar 27. febrúar og lýkur 3. mars. Síðan er rafrænt próf. Nemendur vinna tvö klínísk verkefni á námstímanum og ljúka námskeiðinu í lok vorannar.

Lágmarksfjöldi eru 15 nemendur og hámarksfjöldi 20.

Í námskeiðinu læra nemendur almennt um getnaðarvarnir en sérstaklega um hormónagetnaðarvarnir og hvernig skuli standa að ráðgjöf um getnaðarvarnir. Námskeiðinu er ætlað að gefa fræðilegan grunn en jafnframt að byggja upp klíníska færni til að nemendur verði færir um að veita ráðgjöf, ávísa hormónagetnaðarvörnum, fylgja þeim konum eftir sem fá getnaðarvarnir og takast á við þær aukaverkanir sem upp kunna að koma. Sýnt er hvernig hormónastafur og lykkja er sett upp og fjarlægð og fá nemendur tækifæri til að æfa sig í þeim handbrögðum.

Fyrir starfandi hjúkrunarfræðinga og ljósmæður þarf að sækja um námið í gegnum Endurmenntun: https://endurmenntun.is/namskeid/26101V23.

Umsóknarfrestur verður til og með 13. febrúar. Ekki er tekið við umsóknum eftir þann tíma.

Nemendur við Hjúkrunar- og ljósmóðurfræðifræðideild Háskóla Íslands skrá sig í námskeiðið með hefðbundnum hætti. Nemendur í framhaldsnámi við Háskólann á Akureyri þurfa að sækja um námið sem gestanemar samkvæmt reglum HA.

Umsjónarkennarar: Sóley S. Bender, prófessor og Hildur Sigurðardóttir, lektor

Til bakaAðrir viðburðir

Þetta vefsvæði notar vafrakökur.

Lesa skilmála