Hjukrun.is-print-version

Ábending/Fyrirspurn

Á virkum dögum er fyrirspurnum að jafnaði svarað innan 48 tíma eftir að þær berast.

Vinnuveitendur hjúkrunarfræðinga, sem þiggja laun samkvæmt kjarasamningi félagsins, greiða sem nemur 1,5% af föstum dagvinnulaunum hjúkrunarfræðinga í Vísindasjóð. Sjóðurinn er í vörslu félagsins og skiptist í A og B hluta. Aðild að sjóðnum eiga allir þeir hjúkrunarfræðingar sem eru félagsmenn í Fíh og voru starfandi samkvæmt kjarasamningi félagsins fyrir 31. desember árið fyrir úthlutun.  


A-hluti


A-hluta Vísindasjóðs er ætlað að styrkja endur- og símenntun sjóðsfélaga. Styrkir úr A-hluta eru að jafnaði greiddir sjóðsfélögum í febrúarlok ár hvert.

Ekki þarf að sækja um úthlutun úr A-hluta Vísindasjóðs heldur greiðir félagið hverjum sjóðsfélaga 95% af því iðgjaldi sem komið hefur í sjóðinn á hans nafni frá vinnuveitanda. Upphæðin er lögð inn á bankareikning viðkomandi. Sjóðsfélagi telst sá aðili vera sem var starfandi samkvæmt kjarasamningi félagsins fyrir 31. desember árið fyrir úthlutun.   

Yfirlit yfir greiðslur úr A hluta Vísindsjóðs má finna á Mínum síðum, en aðgengi að þeim krefst annars tveggja: Íslykils eða rafrænna skilríkja.
Þar er einnig hægt að uppfæra persónuupplýsingar, en réttar persónuupplýsingar eru forsendur þess að hægt sé að greiða úr sjóðnum.

B-hluti

 

Sækja skal um styrk úr B-hluta Vísindasjóðs á sérstöku umsóknareyðublaði. Eyðublaðið er Word-skjal og þarf umsækjandi að byrja á því að vista það á sinni tölvu og fylla síðan út og meðhöndla sem venjulegt Word-skjal.

Umsóknir og fylgiskjöl sendist á netfangið visindasjodur@hjukrun.is fyrir miðnætti þann 15. mars ár hvert. Æskilegt er að öll gögn séu á PDF-formi. Öll tölvuskjöl sem send eru sjóðnum skulu merkt með nafni umsækjanda og skýringu á innihaldi. Dæmi: jonajonsdottirCV2017.pdf,  jonajonsdottirFylgiskj2.pdf 

 

 

Umsóknareyðublað

Aðalumsækjandi

Aðalumsækjandi þarf að vera sjóðsfélagi í B-hluta Vísindasjóðs FÍH (sjá reglur um B-hluta Vísindasjóð FÍH). Aðalumsækjandi hefur yfirumsjón með verkefninu og er tengiliður við stjórn sjóðsins í tilvikum þegar fleiri aðilar koma að rannsókninni.

Upphæð, heiti og tegund verkefnis

Skrá skal þá upphæð sem sótt er um í lið 14. Heiti verkefnis má vera lýsandi vinnutitill. Í Tegund verkefnis skal merkja við í viðkomandi reit.  Ef um meistaraverkefni er að ræða þarf að tilgreina fjölda eininga. Ef um doktorsverkefni er að ræða þarf að geta skóla.

Leiðbeinandi, meðrannsakendur og samstarfsaðilar

Ef verkefnið er nemaverkefni skal geta leiðbeinanda. Tilgreina þarf meðrannsakendur og alla samstarfsaðila við verkefnið, starfsheiti og stofnun sem þeir vinna við.

Upphaf verkefnis og áætluð lok

Hér skal skrá tímasetningar (mánuð og ár) á upphafi vinnu við verkefnið og áætluð lok þess eða þess áfanga sem sótt er um. Mikilvægt er að áætla lok verkefnis þar sem reglur sjóðsins kveða á um að seinni hluti styrks fellur niður 2 árum eftir áætluð verklok nema stjórn sjóðsins sé gerð grein fyrir ástæðu seinkunnar.

Stutt lýsing á verkefninu

Hér þarf að gefa í stuttu máli skýra mynd af markmiði, aðferðum og vísindalegu gildi. Þessi kafli jafngildir abstrakt. Nauðsynlegt er að virða hámarks orðafjölda.

Fræðilegt yfirlit (literature review)

Lýsið stöðu alþjóðlegrar þekkingar á því sviði sem verkefnið byggir á. Í lokin skal taka saman í stuttu máli hvað er vitað og hvað ekki á þessu fræðasviði. Nauðsynlegt er að virða hámarks orðafjölda.

Gildi verkefnis fyrir hjúkrun

Gildi getur falist í fræðilegu, tæknilegu, hagrænu og/eða heilsufarslegu gildi niðurstaðna. Lýsið í nokkrum línum gildi verkefnisins hérlendis og/eða erlendis. Nauðsynlegt er að virða hámarks orðafjölda.

Aðferðafræði

Hvaða aðferðir verða notaðar við verkefnið (t.d. eigindlegar, megindlegar). Lýsa þarf búnaði og mælitækjum sem notuð verða. Mælitæki geta verið ýmiss konar, t.d. spurningalistar, rannsóknarmælitæki og fleira. Nauðsynlegar upplýsingar um tækjabúnað eða afrit af spurningalistum þurfa að fylgja. Tilgreina þarf þýði. Fram þarf að koma áreiðanleiki spurningalistanna.

Framkvæmdaáætlun

Lýsið framkvæmdaáætlun skref fyrir skref. Ef um er að ræða rannsókn þarf að fjalla um leyfi, úrtak, aðgang að úrtaki, forprófun aðferðar, gagnasöfnun, úrvinnslu gagna, túlkun niðurstaðna, nýtingu og birtingu niðurstaðna.

Setjið fram tímaáætlun. Lýsið hlutverki meðrannsakenda og annarra samstarfsaðila.

Kostnaðaráætlun

Laun
Tilgreina þarf hverjum verða greidd laun, í hve langan tíma.
Efniskostnaður
Kostnaður við kaup á efni, prentun spurningalista og slíku. Efni geta verið ýmis konar t.d. sáraumbúðir.
Tækjakaup
Tilgreinið hvaða tæki þarf að kaupa s.s. öndunarmælir, Bþ-mælir.
Aðkeypt þjónusta
Greiðsla t.d. til ritara, fyrir tölfræðiþjónustu eða þýðingu spurningalista.
Annar kostnaður
Annar kostnaður sem tilfellur s.s. ferðir, veitingar o.þ.h.
Upphæð 
Hér skal skrá heildarupphæð sem sótt er um.
Rökstuðningur 
Hér þarf að skrá frekari rökstuðning eða skýringar varðandi einstaka kostnaðarliði. Mikilvægt er að allir kostnaðarliðir séu skýrir og að gerð sé grein fyrir hugsanlegum óvissuþáttum.

Aðrir styrkir sem sótt er um eða sem verkefnið hefur hlotið

Hér skal tilgreina hvort sótt hefur verið um eða áætlað að sækja um aðra styrki og þá í hvaða sjóði.

Leyfi til rannsóknarinnar

Samþykki siðanefnda og/eða Persónuverndar eftir því sem við á þarf að fylgja sem fylgiskjal, þar sem þau eru skilyrði fyrir styrkveitingu úr sjóðnum. Leyfi vísindasiðanefndar er skilyrði fyrir rannsókn á heilbrigðissviði.

Frumumsókn eða framhaldsumsókn

Vísað er til þess hvort Vísindasjóður FÍH hafi styrkt sama verkefni áður.

Ef um er að ræða umsókn um styrk til rannsóknar sem hefur áður hlotið styrk úr B-hluta Vísindasjóðs FÍH er óskað eftir að fyllt sé út Framvinduskýrsla þar sem beðið um yfirlit yfir framvindu verkefnisins og til hvaða þátta styrkur var nýttur.

Fylgiskjöl

Krafist er eftirfarandi fylgiskjala:
  • Ferilskrá aðalrannsakanda og leiðbeinanda sé um nemanda að ræða.
  • Leyfi siðanefnda og Persónuverndar eftir því sem við á.
  • Mælitæki/viðtalsrammi
  • Framvinduskýrslu sé umsóknin framhalds-umsókn.

Önnur fylgiskjöl skulu fylgja eftir því sem við á og skal tölusetja þau.

B-hluti Vísindasjóðs styrkir eftirfarandi:

 

Laun
Laun til rannsakanda, meistara- og doktorsnema á meðan á rannsóknarvinnu stendur. Launakostnað til aðstoðarfólks í afmörkuð verkefni rannsóknar. Hámarkslaun sem sjóðurinn viðurkennir eru hin sömu og hjá Rannís.     
Efniskostnað
Kostnað við kaup á efni, prentun spurningalista, sendingarkostnað. Efni geta verið ýmis konar t.d. sáraumbúðir.
Tækjakaup
Tæki sem þarf að kaupa vegna rannsóknarinnar s.s. öndunarmælir, Bþ-mælir og sértækur hugbúnaður.
Aðkeypta þjónustu
Greiðsla t.d. til ritara, fyrir tölfræðiþjónustu eða þýðingu á spurningalistum.
Annan kostnað
Annar kostnaður sem tilfellur s.s. ferðir, veitingar o.þ.h.

 
B-hluti Vísindasjóðs styrkir ekki eftirfarandi:

  • Klínísk þróunar- og gæðaverkefni.
  • Kostnað vegna kynningar á niðurstöðum: Ráðstefnugjald, fargjald á ráðstefnur og gerð veggspjalda.
  • Tæki sem teljast til eðlilegs skrifstofubúnaðar s.s. tölvur og prentara.
  • Prófarkalestur, prentun ritgerða og þýðingar (að undanskyldum þýðingum á spurningalistum)
  • Tvígreiðslu launa meistara- og doktorsnema.

 

Helstu ástæður synjunar

  • Nauðsynleg leyfi fyrir rannsókn liggja ekki fyrir.
  • Rannsókn ekki hafin eða of stutt á veg komin.
  • Ófullnægjandi umsókn.
  • Bókarskrif sem ekki eru fræðiskrif.
  • Rannsóknin telst vera þróunar- eða gæðaverkefni en ekki vísindarannsókn.
  • Gildi rannsóknar fyrir hjúkrun er lítið eða ekki nægilegt.
  • Vísindalegt nýnæmi er lítið eða ekkert.

Áhersluþættir við á mat gæði umsóknar og styrkhæfi

  • Markmið verkefnis
    Er framsetning skýr?
  • Vísindalegt gildi og gildi fyrir hjúkrun
    Er líklegt að verkefnið leiði til nýrrar þekkingar í hjúkrun? Hvert er mikilvægi hennar? Gætu niðurstöður nýst öðrum vísinda- og fræðisviðum?
  • Staða þekkingar
    Er staða þekkingar skýrt sett fram? Er staða þekkingar á rannsóknarsviðinu á því stigi að líklegt sé að settum markmiðum verði náð?
  • Rannsóknar- og framkvæmdaáætlun
    Er lýsing á framkvæmdaáætlun raunhæf og í samræmi við markmið? Er nauðsynleg aðstaða fyrir hendi?  Eru starfskraftar nægir og fagleg þekking þeirra fullnægjandi? Er líklegt að verkefninu verði nægilega vel stjórnað? Er kostnaðar- og tímaáætlun trúverðug?
  • Kostnaðaráætlun
    Er kostnaðaráætlun raunhæf? Er hugsanlegt að fella niður eða lækka einhverja kostnaðarliði án þess að markmið verkefnisins raskist? Ef Já: Á hvern hátt væri slík lækkun framkvæmanleg
  • Reynsla og þekking rannsakenda
    Eru aðstandendur rannsóknarinnar líklegir til að ná þeim árangri sem ætlast er til varðandi: Vísindalega staðla og vinnubrögð, tímasetningar og rekstur verkefnis og greinaskrif
  • Eru umbeðin fylgiskjöl með umsókn?
  • Eru nauðsynleg leyfi fyrir hendi?
  • Styrkleikar og veikleikar verkefnis.
  • Ef umsækjandi hefur fengið fyrri styrki:
    Er greinagerð um framvindu verksins viðunandi og í samræmi við markmið og áætlanir? Liðirnir hafa mismunandi mikið vægi við mat á umsókn. Mest vegur vísindalegt gildi rannsóknar og gildi hennar fyrir hjúkrun, sem er lykilatriði.

    Farið er með umsögnina sem trúnaðarmál.

Umsækjendur sem fengið hafa úthlutað úr sjóðnum áður og ekki hafa lokið þeirri rannsókn þurfa að skila framvinduskýrslu um það verkefni vilji þeir sækja aftur um í sjóðinn.

Framvinduskýrsluna má sækja hér.

Þegar styrkþegi hefur lokið rannsókninni/verkefninu, eða þeim hluta sem styrkurinn nær til, þarf hann að sækja um að fá útborgaðan seinni hluta styrksins á þar til gerðu umsóknareyðublaði.

Umsóknin sendist á netfangið visindasjodur@hjukrun.is

Nafn og heimili

Sjóðurinn heitir B-hluti Vísindasjóðs Félags íslenskra hjúkrunarfræðinga og starfar hann með því skipulagi og markmiðum sem segir í reglum þessum. Heimili sjóðsins og varnarþing er í Reykjavík.

Markmið sjóðsins

Markmið sjóðsins er að stuðla að aukinni fræðimennsku í hjúkrun með því að styrkja rannsóknir og fræðiskrif hjúkrunarfræðinga.

Aðild

Aðild að sjóðnum eiga allir þeir hjúkrunarfræðingar sem eru félagsmenn Fíh og launagreiðendur hafa greitt fyrir í Vísindasjóð á árinu fyrir úthlutun. Kallast þeir sjóðsfélagar. 

Stjórn sjóðsins

Í stjórn sjóðsins sitja fjórir hjúkrunarfræðingar með meistara- og doktorspróf. Þeir eru skipaðir af stjórn félagsins til tveggja ára í senn.

Hlutverk stjórnar

Þeir fjórir fulltrúar sem eru skipaðir af stjórn Fíh fara yfir umsóknir, ákveða styrkhafa og úthluta styrkjum á grundvelli úthlutunarreglna B- hluta sjóðsins.

Tekjur sjóðsins

Tekjur B-hluta Vísindasjóðs eru 3% af tekjum Vísindasjóðs Félags íslenskra hjúkrunarfræðinga og vaxtatekjur hans. 

Hlutverk sjóðsins

Hlutverk sjóðsins er að styrkja sjóðsfélaga sem vinna að rannsóknum, klínískum verkefnum og fræðiskrifum sem gildi hafa fyrir hjúkrun. Sérstök áhersla er lögð á að styrkja klínískar rannsóknir í hjúkrun. Sjóðsfélagar sem eru í námi geta sótt um styrk til að vinna rannsóknarverkefni til meistaragráðu (30 einingar ECTS hið minnsta) eða doktorsgráðu.

Umsóknir

Þeir sem æskja styrks úr sjóðnum skulu senda stjórn sjóðsins umsókn á þar til gerðu eyðublaði með þeim upplýsingum sem stjórn sjóðsins telur nauðsynlegar.
Umsókn og fylgiskjöl skulu berast rafrænt á netfangið visindasjodur@hjukrun.is fyrir miðnætti þann 15. mars ár hvert.  
Umsækjendum er bent á að vönduð umsókn eykur líkur á styrkveitingu. 

Upphæð styrkja

Um er að ræða samkeppnissjóð. Upphæð styrkja ræðst af fjármagni sjóðsins hverju sinni, fjölda umsókna og gæðum og fjárhagsáætlun rannsóknar. 

Afhending styrkja

Rannsóknarstyrkjum er úthlutað einu sinni á ári, að vori. Styrkurinn er greiddur út í tveimur áföngum. Við afhendingu styrksins er greiddur út fyrri helmingur hans og seinni helmingur við lok rannsóknar eða skil á þeim hluta sem styrkurinn náði til. Til að fá seinni helminginn greiddan þarf styrkhafi að senda til sjóðstjórnar umsókn um greiðslu seinni hluta styrksins á eyðublað sem er að finna á vefsvæði Fíh svo og tilskilin gögn. Tilskilin gögn geta verið lokaskýrsla, kynning á niðurstöðum og úrvinnslu eða handrit að grein í ritrýnt tímarit.

Einstaklingar sem hlotið hafa styrk til vísindastarfa í doktorsnámi geta fengið seinni hluta styrks greiddan þegar doktorsritgerð eða handrit að grein í ritrýnt tímarit berst til sviðstjóra fagsviðs félagsins, hvort sem er fyrr. Handritið skal fjalla um hluta af niðurstöðum eða allar niðurstöður úr rannsókn sem unnin var í doktorsnáminu. Handritið skal hafa leiðbeinanda sem meðhöfund.

Sviðstjóri fagsviðs Fíh hefur umsjón með styrkgreiðslum.

Endurgreiðsla

Verði ekkert úr verkefni eða því ekki lokið af einhverjum ástæðum innan þess tíma er gert var ráð fyrir skal styrkþegi gera stjórn vísindasjóðs grein fyrir ástæðum þess og endurgreiða þann hluta styrksins sem ekki hefur verið notaður til verkefnisins.
Ef seinni hluti styrks hefur ekki verið sóttur tveimur árum eftir áætluð verkefnalok og stjórn sjóðsins ekki verið gerð grein fyrir ástæðunni fellur styrkurinn niður og leggst við úthlutunarfé B-hluta Vísindasjóðs að ári.

Samþykktar á aðalfundi Félags íslenskra hjúkrunarfræðinga 19. maí 2011.

Uppfært í febrúar 2014 og janúar 2016.