Styrkurinn er greiddur út í tvennu lagi. Mikilvægt er að áætla lok rannsóknarinnar eins nákvæmlega og kostur er þar sem reglur sjóðsins kveða á um að seinni hluti styrks fellur niður 2 árum eftir áætluð verklok nema stjórn sjóðsins sé gerð grein fyrir ástæðu seinkunnar. Óútskýrður kostnaður er ekki samþykktur.

Nauðsynlegt er að virða hámarks orðafjölda í þeim liðum sem það er gefið upp í umsókninni.

1. Umsækjandi

Aðalumsækjandi þarf að vera sjóðsfélagi í Vísinda- og rannsóknarsjóði Fíh. Aðalumsækjandi hefur yfirumsjón með verkefninu og er tengiliður við stjórn sjóðsins í tilvikum þegar fleiri aðilar koma að rannsókninni. Ef meistara- eða doktorsnemandi er sjóðsfélagi skal hann sækja um styrk í sínu nafni og vera aðalumsækjandi og tengiliður við stjórn sjóðsins. Nemandinn sækir um í sínu nafni styrk fyrir þeim hluta rannsóknar sem hann vinnur, sé rannsóknin hluti af rannsókn leiðbeinanda.

2. Upphæð sem sótt er um

Skrá upphæð sem sótt er um.

3. Heiti rannsóknar

Heiti rannsóknarinnar má vera lýsandi vinnutitill.

4. Tegund rannsóknar

Tegund rannsóknar er merkt við í viðkomandi reit. Ef um meistara- eða doktorsrannsókn er að ræða þarf að tilgreina fjölda eininga og skóla. Meistara-og doktorsrannsókn er að jafnaði styrkt að ákveðnu hámarki einu sinni samkvæmt umfangi rannsóknarinnar. Hægt er að sækja um styrk fyrir meistara-og doktorsrannsókn allt að einu ári eftir lok rannsóknar.

5. Leiðbeinandi, meðrannsakendur og samstarfsaðilar

Ef rannsóknin er meistara- eða doktorsrannsókn skal geta leiðbeinanda. Leiðbeinandinn þarf að staðfesta að hann hafi lesið og samþykkt umsóknina.

6. Meðrannsakendur

Tilgreina alla sem annast þætti í framkvæmd rannsóknar (nafn, vinnustaður/skóli starfsheiti, netfang).

7. Samstarfsaðilar

Tilgreina allar stofnanir skóla og fyrirtæki, innlend eða erlend, sem koma að rannsókninni. Tilgreinið styrktaraðila og hverskonar stuðning eða styrk þeir veita. Leitað er eftir upplýsingum um tegund stuðnings.

8. Upphaf rannsóknar og áætluð lok

Tímasetning (mánuð og ár) á upphafi vinnu við rannsóknina og áætluð lok hennar eða þess áfanga sem sótt er um.

9. Stutt lýsing á rannsókninni (mest 250 orð)

Hér þarf að gefa skýra mynd af markmiði, aðferðum og vísindalegu gildi. Þessi kafli jafngildir útdrætti.

10. Fræðilegt yfirlit (mest 1000 orð fyrir utan heimildalista)

Lýsið stöðu þekkingar á því sviði sem rannsóknin byggir á.

Í lokin skal taka saman eftirfarandi:

• Hvað er vitað um efnið (ein setning)
• Hverju munu niðurstöður bæta við núverandi þekkingu (ein setning)
• Hvaða notagildi munu niðurstöður hafa fyrir hjúkrun (ein setning)

11. Gildi rannsóknar fyrir hjúkrun (mest 150 orð)

Lýsið gildi rannsóknarinnar fyrir hjúkrun (t.d. hagrænu-og eða heilsufarslegu, fræðilegu eða tæknilegu).

12. Aðferðafræði

Lýsa aðferðarfræði rannsóknarinnar (rannsóknarsnið, þátttakendur, mælitæki, búnaður, megin breytur, íhlutanir).

13. Greining rannsóknargagna

Hvaða gagnagreiningu verður beitt. Tilgreina stærð rannsóknaefniviða, úrtak og tölfræðilegt afl eða yfirfærslugildi.

Afrit af viðtalsramma, spurningarlista og/eða gagnasöfnunarramma þarf að fylgja með umsókninni.

14. Framkvæmdaáætlun

Lýsið framkvæmdar- og tímaáætlun sem og hlutverki meðrannsakenda og annarra samstarfsaðila.

Fyrir vísindarannsóknir (aðrar en meistara- og doktorsrannsóknir) gildir að kostnaðaráætlun verður að vera i takt við það sem á að framkvæma á styrktar ári (frá maí mánuði þess árs sem umsóknin er send til maí mánaðar ári síðar).

15. Kostnaðaráætlun

a) Greiðsla launa
Umsækjendur skulu hafa til hliðsjónar almenna kjara og-stofnanasamninga við útreikning launa. Ekki er hægt að nota út seldan taxta til viðmiðunar útreikninga launa. Vísindasjóður styrkir ekki greiðslu launa til þeirra sem eru á fullum launum í öðrum störfum, greiðslu á yfirvinnu eða kaupa á kennsluafslætti.  Dæmi um fullnægjandi útreikning

b) Efniskostnaður
Kostnaður við kaup á efni, prentun spurningalista og slíku.
Efni geta verið ýmis konar t.d. sáraumbúðir og/eða aðrar hjúkrunarvörur.

c) Tækjakaup
Tilgreinið hvaða tæki þarf að kaupa (ekki er hægt að sækja um kostnað vegna liða sem falla undir samrekstur eða aðstöðu þ.m.t. skrifstofuvörur, tölvur, farsíma o.s.frv.).

d) Aðkeypt þjónusta
Greiðsla t.d. fyrir tölfræðiráðgjöf, þýðingu spurningalista eða innslátt og/eða meðhöndlun gagna. Yfirlestur vísindagreina

e) Annar kostnaður
Annar kostnaður sem til fellur s.s. ferðir vegna gagnaöflunar, aðstoð við fjármögnun birtingar í Open Access að hámarki kr. 350.000.-

• Heildarupphæð kostnaðar
  Hér skal skrá heildarupphæð kostnaðar við rannsókn
• Upphæð sem sótt er um

Hér skal skrá þá upphæð sem sótt er um til vísindasjóðs

• Frekari skýringar
  Hér þarf að skrá frekari skýringar varðandi einstaka kostnaðarliði.

Óútskýrður kostnaður verður ekki samþykktur

16. Aðrir styrkir

Aðrir styrkir sem sótt er um eða sem rannsóknin hefur hlotið

Ekki skal sækja um kostnaðarliði sem þegar hefur verið aflað frá öðrum sjóðum.

17. Leyfi til rannsóknarinnar

Leyfi vísindasiðanefndar er skilyrði fyrir rannsókn á heilbrigðissviði. Upplýsingar um heiti siðarnefndar, dagsetning samþykktar og númer þurfa að koma fram í umsókninni eftir því sem við á. Fram þarf að koma dagsetning siðnefndarleyfis og númer siðanefndarleyfis. Ekki þarf að senda samþykktarbréf siðanefndarinnar með umsókninni. Ekki er krafist að umsækjanda hafi borist leyfi siðanefndar en umsækjandi þarf að sýna fram á að leyfið sé í afgreiðslu og senda númer siðanefndarumsóknarinnar. Til þess að fá styrkinn greiddan þá þarf að senda endanlegt siðanefndarleyfi fyrir 1. maí á umsóknarári annars fellur styrkurinn niður. Ef rannsóknin krefst ekki leyfis frá siðanefnd þarf að geta þess sérstaklega og einnig hvort þátttakendur í rannsókninni fengu kynningarbréf og skrifa undir upplýst samþykki.

18. Fylgiskjöl

Krafist er eftirfarandi fylgiskjala:

• Ferilskrá umsækjanda og aðalleiðbeinanda sé um nemanda að ræða.
• Mælitæki/viðtalsrammi/lýsing á íhlutun.
• Framvinduskýrslu hafi umsækjandi fengið áður styrk úr sjóðnum fyrir sama eða ólokið verkefni.

Önnur nauðsynleg fylgiskjöl mega fylgja eftir því sem við á.

Samkvæmt 10 gr. starfsreglna Vísinda- og rannsóknarsjóðs Fíh skal stjórn sjóðsins setja sér úthlutunarreglur sem skulu samþykktar af stjórn Fíh.

Réttindi til umsókna

Þeir félagsmenn Fíh sem launagreiðendur hafa greitt fyrir í Starfsþróunarsetur Fíh í a.m.k. 6 mánuði, þar af samfellda þrjá mánuði eiga rétt á að sækja um styrk í Vísinda- og rannsóknasjóð Fíh.

Umsóknir og gögn

• Umsóknir

Þeir sem sækja um styrk úr Vísinda-og rannsóknarsjóð skulu senda stjórn sjóðsins umsókn á þar til gerðu eyðublaði 

• Gögn

Krafist er eftirfarandi fylgiskjala með umsókn:

• Ferilskrá umsækjanda og aðalleiðbeinanda sé um nemanda að ræða.
• Mælitæki/viðtalsrammi/lýsing á íhlutun.
• Framvinduskýrslu hafi umsækjandi fengið áður styrk úr sjóðnum fyrir sama eða ólokið verkefni.
• Önnur nauðsynleg fylgiskjöl mega fylgja eftir því sem við á.

Frágangur umsókna 

Umsækjandi skal vanda frágang umsóknar. Leiðbeiningar um hvernig umsókn er fyllt út má finna undir kaflanum upplýsingar fyrir umsækjendur.

Afgreiðsla umsókna

Umsókn og fylgiskjöl skulu berast rafrænt í gegnum Mínar síður fyrir miðnætti þann 15. mars ár hvert. Um leið og umsækjandi hefur sent inn umsóknina rafrænt á að hann að fá staðfestingu þess efnis að umsókn sé komin í ferli.

Styrkhæfi rannsókna

Vísinda- og rannsóknasjóður styrkir eftirfarandi:

• Launakostnað
  Greiðsla upp í laun til rannsakenda, meistara-og doktorsnema á meðan á rannsóknarvinnu stendur og til aðstoðarfólks í afmörkuð verkefni.
• Efniskostnað
  Kostnaður við kaup á efni, prentun spurningalista og slíku.
  Efni geta verið ýmis konar t.d. sáraumbúðir og/eða aðrar hjúkrunarvörur.
• Tækjakaup
  Hjúkrunar- eða lækningatæki vegna rannsóknarinnar.
• Aðkeypta þjónustu
  Greiðsla t.d. fyrir tölfræðiráðgjöf, þýðingu spurningalista eða innslátt og/eða meðhöndlun gagna. Yfirlestur vísindagreina á öðru tungumáli en íslensku.
• Annan kostnað
  Annar kostnaður sem til fellur s.s. ferðir, veitingar o.þ.h.

Vísinda - og rannsóknasjóður styrkir ekki eftirfarandi:

• Klínísk þróunar- og gæðaverkefni sem eru ekki vísindarannsóknir.
• Kostnað vegna kynningar á niðurstöðum: Ráðstefnugjald, fargjald á ráðstefnur og gerð veggspjalda.
• Tæki sem teljast til eðlilegs skrifstofubúnaðar s.s. tölvur og prentara og blekhylki.
• Prófarkalestur á íslensku, prentun ritgerða og þýðingar (að undanskildum þýðingum á spurningalistum)
• Tvígreiðslu launa meistara- og doktorsnema.

Eftirfarandi atriði eru helstu ástæður synjunar á umsóknum um styrk

• Nauðsynleg leyfi fyrir rannsókn liggja ekki fyrir.
• Rökstuðningur fyrir kostnaði er ófullnægjandi.
• Gildi rannsókna fyrir hjúkrun er lítið eða ekki nægilegt.
• Rannsókn ekki hafin eða of stutt á veg komin.
• Ófullnægjandi umsókn.
• Bókarskrif sem ekki eru fræðiskrif.
• Þróunar- eða gæðaverkefni en ekki vísindarannsókn.
• Vísindalegt nýnæmi er lítið eða ekkert.

Áhersluþættir við á mat gæði umsóknar og styrkhæfi eru:

• Markmið rannsóknar.
• Vísindalegt gildi og gildi fyrir hjúkrun.
• Staða þekkingar.
• Rannsóknar- og framkvæmdaáætlun.
• Kostnaðaráætlun.
• Reynsla og þekking rannsakenda.
• Eru umbeðin fylgiskjöl með umsókn?
• Eru nauðsynleg leyfi fyrir hendi?
• Styrkleikar og veikleikar rannsóknar.
• Ef umsækjandi hefur fengið fyrri styrki.

Liðirnir hafa mismunandi mikið vægi við mat á umsókn. Mest vegur vísindalegt gildi rannsóknar og gildi hennar fyrir hjúkrun, sem eru lykilatriði.

Farið er með umsögnina sem trúnaðarmál.

Afhending styrkja

Rannsóknarstyrkjum er úthlutað einu sinni á ári, að vori. Styrkurinn er greiddur út í tveimur áföngum. Við afhendingu styrksins er greiddur út fyrri helmingur hans og seinni helmingur við lok rannsóknar eða skil á þeim hluta sem styrkurinn náði til. Til að fá seinni helminginn greiddan þarf styrkhafi að senda til sjóðstjórnar umsókn um greiðslu seinni hluta styrksins á eyðublað sem er að finna á vefsvæði Fíh svo og tilskilin gögn. Tilskilin gögn geta verið lokaskýrsla, kynning á niðurstöðum og úrvinnslu eða handrit að grein í ritrýnt tímarit.

Einstaklingar sem hlotið hafa styrk til vísindastarfa í doktorsnámi geta fengið seinni hluta styrks greiddan þegar doktorsritgerð eða handrit að grein í ritrýnt tímarit berst til sjóðsins, hvort sem er fyrr. Handritið skal fjalla um hluta af niðurstöðum eða allar niðurstöður úr rannsókn sem unnin var í doktorsnáminu. Handritið skal hafa leiðbeinanda/fulltrúa úr doktorsnefnd sem meðhöfund.

Sviðstjóri fagsviðs Fíh hefur umsjón með styrkgreiðslum.

1. gr. Nafn og heimili

Sjóðurinn heitir Vísinda- og rannsóknarsjóður Félags íslenskra hjúkrunarfræðinga (áður B hluti Vísindasjóðs Fíh) og starfar hann með því skipulagi og markmiðum sem segir í reglum þessum. Heimili sjóðsins og varnarþing er í Reykjavík.

2. gr. Hlutverk sjóðsins

Hlutverk sjóðsins er að styrkja sjóðsfélaga sem vinna að rannsóknum og fræðiskrifum sem gildi hafa fyrir hjúkrun. Sérstök áhersla er lögð á að styrkja klínískar rannsóknir í hjúkrun. Sjóðsfélagar sem eru í námi geta sótt um styrk til að vinna rannsóknarverkefni til meistaragráðu (30 einingar ECTS hið minnsta) eða doktorsgráðu.

3 gr. Aðild

Aðild að sjóðnum eiga allir þeir hjúkrunarfræðingar sem eru félagsmenn Fíh og launagreiðendur hafa greitt fyrir í Starfsþróunarsetur Fíh í a.m.k. 6 mánuði á árinu fyrir úthlutun þar af samfellda þrjá mánuði. Kallast þeir sjóðsfélagar.

4. gr. Stjórn sjóðsins

Í stjórn sjóðsins sitja fjórir hjúkrunarfræðingar með doktorspróf. Þeir eru skipaðir af stjórn Fíh til tveggja ára í senn frá aðalfundi.

Stjórn skiptir með sér verkum og skal skipa formann.

Komi til þess að stjórnarmenn láti af störfum skal stjórn Fíh skipa nýjan stjórnarmann í þess stað.

Stjórn skal skrá fundargerðir.

5. gr. Hlutverk stjórnar

Stjórn sjóðsins skal fara yfir umsóknir, ákveða styrkhafa og úthluta styrkjum á grundvelli úthlutunarreglna Vísinda- og rannsóknarsjóðs Fíh

6. gr. Tekjur sjóðsins

Tekjur Vísinda- og rannsóknarsjóðs Fíh eru allt að 5% af framlögum launagreiðanda til Starfsþróunarseturs Fíh (StFíh) samkvæmt 5. gr. samþykkta Starfsþróunarseturs Fíh.

7. gr. Umsóknir

Þeir sem sækja um styrk úr sjóðnum skulu senda stjórn sjóðsins umsókn á þar til gerðu eyðublaði  ásamt viðeigandi fylgiskjölum. Umsókn og fylgiskjöl skulu berast rafrænt í gegnum Mínar síður fyrir miðnætti þann 15. mars ár hvert.

8. gr. Upphæð styrkja

Um er að ræða samkeppnissjóð. Upphæð styrkja ræðst af fjármagni sjóðsins hverju sinni, fjölda umsókna og gæðum og fjárhagsáætlun rannsóknar.

9. gr. Afhending styrkja

Rannsóknarstyrkjum er úthlutað einu sinni á ári, að vori. Styrkurinn er greiddur út í tveimur áföngum. Við afhendingu styrksins er greiddur út fyrri helmingur hans og seinni helmingur við lok rannsóknar eða skil á þeim hluta sem styrkurinn náði til. Sótt er um seinni hluta styrks á þar til gerðu eyðublaði inn á vefsvæði Fíh.

Ef seinni hluti styrks hefur ekki verið sóttur tveimur árum eftir áætluð verkefnalok og stjórn sjóðsins ekki verið gerð grein fyrir ástæðunni fellur styrkurinn niður.

Sviðstjóri fagsviðs Fíh hefur umsjón með styrkgreiðslum.

10. gr. Úthlutunarreglur

Sjóðsstjórn setur úthlutunarreglur sem skulu samþykktar af stjórn Fíh.

11. gr. Gildistaka og önnur ákvæði

Reglur þessar voru samþykktar af stjórn Fíh 28. janúar 2026.