• Kostnaður við nám, námskeið, ráðstefnur og málþing.
• Ferðakostnaður (s.s. vegna flugfargjalda eða aksturskostnaðar)
• Hótel- og gistikostnaður

• Uppihald (fæðiskostnaður) og ferðir innan borga/bæja
• Launatap
• Bókakostnaður eða námsgögn
• Tómstundanámskeið
• Annað starfsnám
• Kynnisferðir á heilbrigðisstofnanir án skipulagðrar faglegrar dagskrár í a.m.k. 6-8 klukkustundir

Einstaklingar

1. Um Starfsþróunarsetur Fíh og rétt sjóðsfélaga 

1.1 Um Starfsþróunarsetur Fíh 

Starfsemi Starfsþróunarseturs Fíh (StFíh) byggir á samþykktum þess.

StFíh er starfrækt á grundvelli kjarasamninga milli fjármála- og efnahagsráðherra f.h. ríkissjóðs, Sambands íslenskra sveitarfélaga og Reykjavíkurborgar annars vegar og Félags íslenskra hjúkrunarfræðinga (Fíh) hins vegar.

1.2. Myndun réttinda í StFíh

Réttur til aðildar að StFíh hefst þegar iðgjald fyrir hjúkrunarfræðing hefur verið greitt í samtals sex mánuði, þar af samfellda þrjá mánuði. Hjúkrunarfræðingur heldur aðildarrétti í fæðingarorlofi greiði hann félagsgjald til Fíh. Lífeyrisþegi heldur aðildarrétti í 12 mánuði frá því að viðkomandi lætur af störfum.

Réttindi í StFíh tekur mið af þeim iðgjöldum sem greidd eru í StFíh.

2. Styrkhæf verkefni og upphæð styrks 

2.1 Inntak verkefnis  

Verkefni þarf að jafnaði að varða fagsvið hjúkrunar til að vera styrkhæft og auka fagþekkingu og starfshæfni hjúkrunarfræðings á sviði hjúkrunar, stjórnunar, samskipta, tækni og tungumála. Stjórn StFíh metur vafatilvik. 

2.2 Staðsetning verkefnis  

Hægt er að sækja um styrk vegna verkefna innanlands sem utanlands, svo sem námskeið, ráðstefnur, málþing og viðbótarnám sem tengist hjúkrun. Lýsing verkefnis verður að fylgja með umsókninni svo að hægt sé að taka afstöðu til hennar. Ef námskeið er haldið erlendis þarf rökstuðning fyrir staðarvali.  

2.3. Styrkhæfi verkefna

Eftirfarandi er styrkhæft:

• Framhaldsnám á háskólastigi.
• Faglegt nám, námskeið og ráðstefnur sem tengjast starfsþróun á fagsviði hjúkrunar eða heildstætt nám á nýju fagsviði hjúkrunar (starfsferilsþróun).
• Tungumála-, upplýsingatækninám og starfslokanámskeið
• Áskrift að fagtímaritum sem eru ekki hluti af Landsaðgangi og eru á fagsviði hjúkrunarfræðings
• Önnur námskeið sem miða að því að styrkja hjúkrunarfræðing í starfi. Slík námskeið eru styrkt að hámarki 100.000 á 24 mánaða tímabili. Í umsókn þarf að koma fram:
• Hvenær námskeið hefst og hvenær því lýkur
• Skýr markmið
• Rökstyðja þarf staðarval
• Rökstuðingur um hvernig námskeiðið muni nýtast í starfi

2.4 Staðfesting fræðsluaðila

StFíh áskilur sér rétt til þess að óska eftir staðfestingu frá fræðsluaðila á þátttöku umsækjanda í því verkefni sem sótt hefur verið um styrk fyrir.

2.5 Hvað er styrkt?

Styrkir eru veittir vegna eftirtalinna kostnaðarþátta:

• Skólagjalda
• Námskeiðsgjalda
• Ráðstefnugjalda
• Námsgagna sem tengjast lið A og B
• Ferðakostnaðar sem hlýst af A til C
• Flugkostnaðar
• Gistikostnaðar
• Eingöngu vegna þeirra gistinátta sem falla til meðan á verkefni stendur (t.d. ráðstefnu), þ.e. nóttin áður en það hefst, nætur meðan á því stendur og nóttin eftir að því lýkur. Ekki er tekið tillit til gistinátta sökum flugáætlana flugfélaga.
• Kostnaður vegna gistingar er að öllu jöfnu ekki styrktur lengur en í fjórar vikur.
• Samgöngum til og frá millilandaflugvelli erlendis
• Fastur styrkur vegna aksturs innanlands

• Ef vegalengd frá lögheimili að náms-/ráðstefnustað eða millilandaflugvelli er lengri en 100 km er greiddur styrkur miðað við kílómetrafjölda
• 100–199 km 20.000 kr.
• 200–299 km 30.000 kr.
• 300–399 km 40.000 kr.
• 400–499 km 50.000 kr.
• 500+ km 60.000 kr.
• Ef vegalengd frá lögheimili að námsstað/ráðstefnustað eða millilandaflugvelli er styttri en 100 km eru samtals greiddar 8.000 kr.
• Vakin er athygli á því að um er að ræða heildargreiðslu vegna ofangreindra vegalengda. Ekki er horft til kílómetrafjölda fram og til baka né uppsafnaðra ferða.

2.6 Styrkir eru ekki veittir vegna:

• Tómstundanámskeiða
• Kynnis- og heimsóknarferða
• Rannsóknarleyfa
• Fæðiskostnaðar
• Ferða innan borga og sveitarfélaga
• Launataps
• Bílastæðagjalda, bílaleigubíla eða bensínkostnaðar  
• Verkefna þar sem leiðbeinandi fer frá Íslandi til að halda námskeið/kynningu/ fræðsluerindi á erlendri grundu
• Námskeiða sem hafa það að markmiði að vinna með lífsstíl og heilsu eða eru hluti af meðferðarúrræðum
• Ráðstefna og námskeiða erlendis sem stofnun/sveitarfélag/sjálfseignarstofnun/ aðildarfélag, sbr. gr. 10.3., hefur sótt um styrk fyrir

2.7 Fyrirvarar  

• Verkefni er styrkhæft í allt að 12 mánuði frá því að til útgjalda var stofnað. Kvittanir mega því vera allt að 12 mánaða gamlar. 
• Aðeins er hægt að nota hverja greiðslukvittun einu sinni. 
• Ekki er hægt að flytja ónýttan styrk milli viðmiðunartímabila þ.e. 24 mánaða tímabils. 

3.0. Styrktarfjárhæð 

Hámarksstyrkur er 600.000 kr. miðað við full réttindi í StFíh á 24 mánaða fljótandi tímabili. Aldrei eru greiddir hærri styrkir en sem nemur framlögðum reikningum.

A. Fullur styrkur

Sé mánaðarlegt iðgjald hjúkrunarfræðings í StFíh 3.600 kr. eða hærra, veitir það rétt á fullum styrk, 600.000 kr. að hámarki á 24 mánaða fljótandi tímabili.

B. Hálfur styrkur 

Sé mánaðarlegt iðgjald hjúkrunarfræðings í StFíh á bilinu 1.750 til 3.600 kr. veitir það rétt á hálfum styrk eða 300.000 kr. á hverju 24 mánaða tímabili.  

C. Umsókn ekki styrkhæf

Sé mánaðarlegt iðgjald hjúkrunarfræðings í StFíh 1.749 kr. eða lægra er umsókn ekki styrkhæf.

3.2. Styrkhæfi

Leiki vafi á því hvort hjúkrunarfræðingur eigi rétt á fullum eða hálfum styrk skal meðaltal inngreiðslna iðgjalda síðustu þriggja mánaða reiknað út, talið frá þeim degi sem umsókn berst til sjóðsins.

• Ef reiknað meðaltal er 3.600 kr. eða hærra á viðkomandi rétt á fullum styrk, talið frá umsóknardegi.
• Ef reiknað meðaltal inngreiðslna iðgjalda síðustu þriggja mánaða, talið frá umsóknardegi, er á bilinu 1.750 til 3.600 kr. á viðkomandi rétt á hálfum styrk.
• Ef reiknað meðaltal inngreiðslna iðgjalda síðustu þriggja mánaða, talið frá umsóknardegi, er undir 1.750 kr. á viðkomandi ekki rétt á styrk úr sjóðnum.

3.3 Forgangur  

Ef stefnir í sjóðsþurrð miðað við tekjur og væntanlegar skuldbindingar að mati stjórnar StFíh skulu þeir njóta forgangs sem aldrei hafa notið fyrirgreiðslu frá sjóðnum. Ef enn er þörf á forgangsröðun er sjóðsstjórn heimilt að veita fræðilegum verkefnum forgang umfram önnur. 

4. Umsóknir

4.1 Afgreiðsla umsókna 

Skrifstofa Fíh afgreiðir umsóknir samkvæmt úthlutunareglum þessum og í samræmi við ákvarðanir stjórnar. Þær umsóknir sem uppfylla skilyrði skulu afgreiddar af skrifstofu Fíh mánaðarlega, að júlí undanskildum, og koma þær til greiðslu 15.-17. hvers mánaðar.  

Stjórn StFíh sker úr um vafaatriði svo sem um sjóðsaðild eða styrkhæfi umsókna og tekur á öðrum málum sem upp kunna að koma.

4.2 Hver á rétt á styrk? 

Einungis hjúkrunarfræðingur sem greitt hefur verið iðgjaldi til StFíh getur sótt um styrk. Stjórn StFíh getur lækkað styrk ef aðrir taka þátt í kostnaði við verkefnið. Telji stjórn að umsókn ætti að greiðast af öðrum áskilur hún sér rétt til að hafna umsókn.  

5. Umsóknir, frágangur og afgreiðsla 

5.1 Umsóknir  

Umsóknum ásamt gögnum skal skila inn rafrænt til skrifstofu Fíh. Sótt er um á Mínum síðum. 
 

5.2 Frágangur umsókna 

Umsækjandi skal vanda frágang umsóknar. Krafist er nákvæmrar lýsingar á verkefni  sem umsækjandi hyggst verja styrknum til, auk rökstuðnings um hvernig verkefnið muni nýtast í starfi. Ef umsókn uppfyllir ekki skilyrði fyrir úthlutun er henni hafnað. 

Til nauðsynlegra gagna teljast: 

• nafn á verkefni sem sótt er um (námi, námskeiði, málþingi, ráðstefnu) 
• nákvæm lýsing á verkefni sem sótt er um, m.a. rökstuðningur fyrir því hvernig verkefnið muni nýtast í starfi
• staðfesting greiðslu fyrir verkefni sem sótt er um 

Umsækjandi getur fylgst með framgangi umsóknar á mínum síðum á hjukrun.is. 

5.3 Afgreiðsla umsókna

Fullgildar umsóknir sem berast fyrir 1. dag hvers mánaðar eru afgreiddar af skrifstofu Fíh sbr. 2. gr. Aðrar umsóknir sem ekki uppfylla 2. gr eru afgreiddar af stjórn.  Þær umsóknir sem berast í:  

• janúar eru afgreiddar í febrúar 
• febrúar eru afgreiddar í mars  
• mars eru afgreiddar í apríl 
• apríl  eru afgreiddar í maí 
• maí eru afgreiddar í júní 
• júní og júlí eru afgreiddar í ágúst 
• ágúst eru afgreiddar í september 
• september eru afgreiddar í október 
• október eru afgreiddar nóvember 
• desember eru afgreiddar  janúar

Þegar umsókn hefur verið afgreidd þá berst greiðslutilkynning til umsækjanda í tölvupósti. 

Hafi viðeigandi fylgisköl ekki borist þremur mánuðum eftir að umsókn var send inn fellur hún niður.

6. Styrkveiting

6.1 Greiðslustaðfesting 

Greiðslur úr StFíh fara fram gegn framvísun reikninga og greiðslukvittana. Á gögnunum þarf að koma fram nafn og/eða kennitala og fyrir hvað er greitt. Ef greiðslukvittun er glötuð að fullu tekur stjórn ákvörðun um afgreiðslu styrksins. 

6.2 Útborgun styrks 

Styrkir úr StFíh eru greiddir út á bilinu 15.-17. dags hvers mánaðar sem úthlutað er eða næsta virka dag þar á eftir. Greiðsla styrkja felur alltaf í sér endurgreiðslu útlagðs kostnaðar. Styrkur er aldrei greiddur út fyrir fram. 

 
6.3 Upplýsingar til skattayfirvalda 

Í byrjun hvers árs eru sendar upplýsingar til skattayfirvalda þar sem gerð er grein fyrir veittum styrkjum síðastliðins árs.  

7. Tími milli styrkveitinga, ofgreiðsla 

7.1 Sótt um aftur í tímann 

Hægt er að sækja um styrk fyrir verkefni allt að 12 mánuði aftur í tímann miðað við lok verkefnis. Móttaka umsóknar verður því að vera innan 12 mánaða frá lokum verkefnis.  

7.2 Tvígreiðsla eða ofgreiðsla styrks  

Ef mistök verða í afgreiðslu styrkumsóknar eða greiðslu styrks mun skrifstofa Fíh leitast við að leiðrétta mistök eins fljótt og hægt er. Ef umsækjandi hefur fengið tvígreiddan styrk eða ofgreidda styrkupphæð þarf hann að tilkynna StFíh mistökin og endurgreiða þegar í stað þá upphæð sem munar til StFíh. 

7.3 Réttur til að hætta við umsókn 

Ef umsókn er dregin til baka áður en styrkur er greiddur hefur umsóknin engin áhrif á réttindi umsækjanda hjá StFíh. 

8. Hlé eða rof á sjóðsaðild  

8.1 Launalaust leyfi 

Hjúkrunarfræðingur í launalausu leyfi á rétt á styrk samkvæmt reglum StFíh fyrstu sex mánuðina að öðrum skilyrðum uppfylltum. Skila þarf inn með umsókn vottorði frá vinnuveitanda sem staðfestir að viðkomandi sé í launalausu leyfi.  

8.2 Atvinnuleysi 

Atvinnulausir sjóðsfélagar geta sótt um og fengið styrk úr StFíh samkvæmt eftirfarandi reglum: 

• Skilyrði: Umsækjandi hefur átt aðild að StFíh einhvern tíma á síðustu 12 mánuðum og verið með aðild í a.m.k. 6 mánuði við upphaf atvinnuleysis, þ.e. verið í starfi hjá launagreiðanda sem greiðir framlag í StFíh. 
• Styrkhæfi: Sömu reglur gilda eins og fyrir aðra með aðild. Að auki má veita styrk til námskeiðs sem tengist beinlínis atvinnuleysi umsækjenda eða auðveldar honum að öðlast starf á ný. 

8.3 Veikindi 

Hjúkrunarfræðingar halda réttindum sínum í StFíh fyrir það tímabil sem þeir fá greidda sjúkradagpeninga frá Styrktarsjóði Fíh. Eins er farið með mál þeirra sem þiggja endurhæfingarlífeyri hjá Tryggingastofnun.

 8.4 Fæðingarorlof 

Hjúkrunarfræðingar njóta óskertra réttinda í fæðingarorlofi samkvæmt lögum nr. 144/2020 um fæðingar- og foreldraorlof ef greitt er stéttarfélagsgjald af greiðslum fæðingarorlofssjóðs til Fíh. Hjúkrunarfræðingur í fæðingarorlofi hefur samband við skrifstofu Fíh vegna umsóknar sinnar. 

8.5. Aðildarlok

Ef ekkert af ofangreindu á við, mun aðild að StFíh falla niður að þremur mánuðum liðnum frá því síðast var greitt iðgjald til StFíh.

9. Málskotsréttur 

Ef umsækjandi er ósáttur við afgreiðslu StFíh á styrkumsókn sinni og fylgigögnum á hann rétt á að óska eftir endurskoðun á ákvörðun stjórnar StFíh. Beiðni um endurskoðun skal fylgja rökstuðningur og nánari útskýringar á verkefninu sem hafnað var. Slík beiðni verður tekin fyrir á næsta fundi stjórnar StFíh.

Stofnanir, sveitarfélög, sjálfseignarstofnanir og fyrirtæki

10. Stofnanir, sveitarfélög, sjálfseignarstofnanir og fyrirtæki

10.1 Réttur stofnana, sveitarfélaga, sjálfseignarstofnana, fyrirtækja og Félags íslenskra hjúkrunarfræðinga til að sækja um styrki

Stofnanir, sveitarfélög og sjálfseignarstofnanir (stofnanir) þurfa að uppfylla eftirfarandi skilyrði til að geta sótt um styrki:

• Stofnanir þurfa að vera tilgreindar undir 1. mgr. 1. gr. laga nr. 94/1986 eða sjálfseignarstofnanir sem falla undir 2. gr. sömu laga.
• Stofnanir þurfa að hafa gildan kjarasamning við Fíh.

10.2 Styrkhæfi verkefna

Verkefni þurfa að falla að markmiðum stofnunar í starfsþróunarmálum og taka til hjúkrunarfræðinga sem iðgjöld eru greidd fyrir til StFíh:

• Verkefni sem snúa að þróun mannauðs og leiða af sér nýsköpun, framþróun og/eða breytt verklag.
• Styrkir eru veittir til stofnana til að setja upp skilgreint verklag í mannauðsmálum t.d. eftirfarandi:
• Starfsmannastefna
• Mannaflagreining og mannaflaspá
• Starfsgreining, hæfni og starfslýsing
• Starfsmannasamtal og mat á frammistöðu
• Starfsþróun - og gerð starfsþróunaráætlana
• Mannauðsmælikvarðar
• Teymisvinna

10.3 Hvað er styrkt?

Styrkir eru veittir vegna eftirtalinna kostnaðarþátta:

• Kostnaður vegna leiðbeinenda/námskeiðshaldara/ráðgjafa
• Salarleiga og tækniaðstoð
• Námsgögn og gerð rafræns fræðsluefnis
• Faghandleiðsla til eflingar í starfi
• Kostnaður vegna sérhæfðra ráðstefna og námskeiða fyrir hjúkrunarfræðinga stofnunar
• Fræðsluferðir: kynnisferðir/heimsóknarferðir
• Starfseiningar stofnana (deildir/svið) geta sótt um styrki vegna skipulagðra fræðsluferða sem tengjast fagsviði eða starfi þeirra. Á þetta við um fræðsluferðir innanlands sem utan.
• Dagskrá vegna fræðsluferðar erlendis þarf að skiptast á a.m.k. tvo daga og þarf hún að spanna að lágmarki 8 klst. í fræðslu. Stjórnandi viðkomandi starfseiningar skal tilgreina markmið ferðarinnar og hvernig hún nýtist til frekari þróunar starfseiningarinnar. Ítarleg lýsing ferðar þarf að fylgja með þar sem tímasetningar eru tilgreindar ásamt þátttakendalista.

10.3 Styrkir eru ekki veittir vegna:

• Rannsóknarferða
• Samráðsfunda
• Kaupa, þróunar og áskriftar að hugbúnaðarlausnum
• Fæðiskostnaðar eða dagpeninga
• Launataps
• Ferða innan borga/sveitarfélaga
• Bílastæðagjalda eða bensínkostnaðar
• Verkefna þar sem leiðbeinandi fer frá Íslandi til að halda námskeið/ kynningu/ fræðsluerindi á erlendri grundu.

10.4 Umsóknir

Umsóknum er skilað til skrifstofu Fíh ásamt fylgigögnum. Nauðsynlegt er að fram komi nafn ábyrgðarmanns verkefnis og umboð yfirmanns.

• Í umsóknum skal m.a. koma fram lýsing á því verkefni sem sótt er um styrk fyrir, efnisinntak, kostnaðaráætlun og hvort um verði að ræða aðra styrki og/eða framlag frá umsækjanda.
• Eftirfarandi gögn þurfa að fylgja með umsóknum:
• Umsögn frá stjórnanda viðkomandi starfseiningar sem tilgreinir markmið ferðarinnar og hvernig hún nýtist til frekari þróunar stafseiningarinnar
• Ítarleg dagskrá ferðar þar sem tímasetningar eru tilgreindar, þ.m.t. brottfarardagur og komudagur
• Þátttakendalisti hjúkrunarfræðinga
• Vefslóð eða útgefin gögn um ráðstefnu eða námskeið

Styrkur er greiddur gegn framvísun reikninga fyrir útlögðum kostnaði sem sótt er um styrk fyrir. Reikningar skulu sýna sundurliðun allra kostnaðarþátta, svo sem gisti- og flugkostnaðar. Um allar umsóknir gildir að hægt verði að kanna styrkhæfi verkefnis áður en lagt er út fyrir kostnaði með því að skila inn umsókn.

Til að fá vilyrði fyrir styrk í tæka tíð vegna fræðslu- og ráðstefnuferða þarf að sækja um með þriggja mánaða fyrirvara.

Reikningar þurfa að berast eigi síðar en tólf mánuðum eftir að verkefni lýkur.

10.5 Styrkfjárhæð

Stjórn ákvarðar hvaða fjármagni er veitt í styrki til stofnana í samræmi við áherslur stjórnar hverju sinni.

Félag íslenskra hjúkrunarfræðinga, fjármála- og efnahagsráðuneytið, Samband íslenskra sveitarfélaga og Reykjavíkurborg

11.0 Réttur Félags íslenskra hjúkrunafræðinga, fjármála- og efnahagsráðuneytis, Sambands íslenskra sveitarfélaga og Reykjavíkurborgar til styrkja

Rétt til að sækja um styrki til Starfsþróunarseturs StFíh hafa Félag íslenskra hjúkrunarfræðinga, fjármála- og efnahagsráðuneytið, Samband íslenskra sveitarfélaga, Reykjavíkurborg, sem og þær stofnanir/aðildarfélög sem hafa öðlast rétt samkvæmt samþykktum sjóðsins.

11.1 Styrkhæfi verkefna

Námskeið, ráðstefnur og sérstök átaksverkefni sem stuðla að eflingu starfsþróunar og mannauðs ofantaldra aðila eru styrkhæf, samanber gr. 10.3

11.2 Umsókn

Umsóknum er skilað til skrifstofu Fíh ásamt fylgigögnum. Nauðsynlegt er að fram komi nafn ábyrgðarmanns verkefnis og umboð yfirmanns.

11.3 Styrkfjárhæð

Stjórn ákvarðar þá fjárhæð sem veitt er í styrki í samræmi við áherslur stjórnar hverju sinni.

12. Vísinda og rannsóknarsjóður Fíh

Árlega skulu allt að 5% af framlögum launagreiðanda til StFíh renna í Vísinda - og rannsóknarsjóð hjúkunarfræðinga. Markmið sjóðsins er að stuðla að aukinni fræðimennsku í hjúkrun með því að styrkja rannsóknir og fræðiskrif hjúkrunarfræðinga.

Rannsóknarsjóður hefur sér starfsreglur og stjórn sem starfar samkvæmt þeim ákvæðum.

13. Gildistökuákvæði

Reglur þessar eru samþykktar af stjórn StFíh 04.06.25. Við gildistöku falla úr gildi eldri úthlutunarreglur starfsmenntunarsjóðs Fíh. Úthlutunarreglur eru endurskoðaðar árlega og eru birtar jafnóðum á vef Fíh.

1. Stjórn Starfsþróunarsetursins (StFíh) er heimilt að móta starfsreglur samkvæmt 8. gr samþykkta StFíh dags. 12.05.25 Við gerð þeirra skal tekið mið af annars vegar markmiðum StFíh eins og þau koma fram í samþykktum og hins vegar þeirri reynslu sem verður til við rekstur StFíh.

2. Stjórnin skal ákvarða verkaskiptingu milli hennar og skrifstofu Fíh. Í því felst m.a. að skilgreina með hvaða hætti skrifstofu Fíh er ætlað að miðla upplýsingum um daglega framkvæmd og rekstur til stjórnar og hvaða heimildir hann hefur til að skuldbinda StFíh.

3. Stjórn StFíh gerir samning við Fíh um útvistun á rekstri StFíh. Í slíkum samningi skal kveðið á um ábyrgð og framkvæmd daglegs rekstrar, m.a. varðandi starfsmannamál, fjármál og annan rekstur. Samningurinn skal gerður skriflega og samþykktur af stjórn StFíh.

4. Stjórn skal ákvarða með hvaða hætti tekjur StFíh skulu ávaxtaðar og gera fjárfestingastefnu.

5. Stjórn StFíh ákvarðar þóknun til stjórnarmanna í samræmi við verklag Fíh um greiðslur fyrir nefndarstörf á vegum Fíh.

6. Stjórnin skal fyrir desember ár hvert samþykkja fjárhags- og starfsáætlun sem tilgreinir áherslur næsta árs.

7. Við framsetningu fjárhags- og starfsáætlunar skal stjórn ákvarða hlutfallslega fjárveitingu til þeirra sem rétt eiga á styrk.

Þeir eru:

• hjúkrunarfræðingar, sem greitt er fyrir í sjóðinn og eru með fulla aðild að Fíh
• stofnun, á vegum ríkis, borgar, sveitarfélaga og SFV ýmist hver fyrir sig eða í samstarfi
• Rannsóknarsjóði Fíh er tryggt 5% framlag á ári hverju
• samningsaðilar skv. 1. gr.
• aðrir en þeir sem taldir eru upp í 1. gr. samþykkta StFíh geta sótt um aðild að setrinu s.s. sjálfseignastofnanir.

8. Stjórnin skal setja fram og kynna úthlutunarreglur StFíh á vef Fíh hjukrun.is þar sem fram kemur viðmið við mat á umsóknum og með hvaða hætti skuli sótt um.

9. Stjórn fundar að jafnaði mánaðarlega.

Samþykkt 4. júní 2025.