Kafli I – Nafn deildar og tilgangur

1 gr. Nafn
Nafn deildarinnar er deild erlendra hjúkrunarfræðinga og starfar hún innan Félags íslenskra hjúkrunarfræðinga (Fíh). Heimili og varnarþing deildarinnar er í Reykjavík en umdæmið er landið allt. Lög Félags íslenskra hjúkrunarfræðinga gilda einnig um deildina.

2.gr. Tilgangur

Tilgangur deildarinnar er að vera faglegur vettvangur innan Fíh sem styður hjúkrunarfræðinga með erlendan bakgrunn á Íslandi og eflir þátttöku þeirra í heilbrigðiskerfinu.

Markmið deildarinnar eru að:

· Hafa áhrif á stefnumótun í heilbrigðismálum, einkum í málum er varðar stöðu, aðlögun og starfsskilyrði hjúkrunarfræðinga með erlendan bakgrunn og þjónustu við fjölbreyttan skjólstæðingahóp.

· Efla menntun, tungumálakunnáttu og fagþróun hjúkrunarfræðinga af erlendum uppruna og stuðla að menningarhæfni í hjúkrun.

· Stuðla að miðlun þekkingar, rannsóknar og reynslu sem tengist fjölmenningarlegri hjúkrun, aðlögun heilbrigðisstarfsfólks og gæðum þjónustu.

· Vera tengiliður við Fíh sem gætir hagsmuna félagsmanna

· Byggja upp gott samstarf við fagdeildir Fíh, erlend fagfélög og önnur samtök hjúkrunarfræðinga með áherslu á miðlun þekkingar og reynslu hjúkrunarfræðinga með erlendan bakgrunn sem starfa í íslensku heilbrigðiskerfi

· Vera Fíh, stjórn þess og nefndum til ráðgjafar í málefnum sem varðar erlenda hjúkrunarfræðinga, fjölbreytileika og inngildingu í íslenskt heilbrigðiskerfi

Deildin heyrir undir fagsvið Félags íslenskra hjúkrunarfræðinga.

Kafli II – Aðild

3. gr. Aðild
Rétt til aðildar að deildinni eiga þeir hjúkrunarfræðingar sem eru félagsmenn í Félagi íslenskra hjúkrunarfræðinga og eru af erlendum uppruna, sem og hjúkrunarnemar af erlendum uppruna sem eru með aukaaðild að Fíh. Einnig eiga aðrir félagsmenn Fíh rétt til aðildar, enda hafi þeir áhuga á málefnum erlendra hjúkrunarfræðinga, fjölbreytileika og inngildingu í íslenskt heilbrigðiskerfi

4. gr. Umsókn um aðild
Skrifstofa Fíh tekur við umsóknum um inngöngu í deildina og sendir áfram til stjórnar deildarinnar. Félagsmaður sem ekki hefur greitt félagsgjald í tvö ár fellur út af félagaskrá.

5. gr. Úrsögn
Úrsögn úr deildinni er hægt að skila skriflega til stjórnar. Einnig getur stjórn litið á það sem úrsögn ef félagsmaður hefur ekki greitt árgjald deildarinnar tvö ár í röð.

Kafli III – Skipulag deildar

6. gr. Lög
Deildin heyrir undir Félag íslenskra hjúkrunarfræðinga og lög félagsins eru lög deildarinnar.

7. gr. Aðalfundur
Aðalfundur fer með æðsta vald í málefnum deildarinnar. Hann skal haldinn ár hvert í febrúar eða mars. Til aðalfundar skal boða með sannanlegum hætti og með að minnsta kosti tveggja vikna fyrirvara. Fundarboði skulu fylgja dagskrá fundarins og þær tillögur sem leggja á fyrir fundinn. Aðalfundur telst löglega boðaður hafi verið boðað til hans með þeim hætti og innan þess frests sem að framan greinir. Heimilt er að halda aðalfund sem staðfund, fjarfund eða blandaðan fund. Sé fundur haldinn sem fjarfundur eða blandaður fundur skal tryggt að fundarmenn njóti sambærilegra réttinda til þátttöku og á staðfundi, þar á meðal til að fylgjast með fundarstörfum, taka til máls, bera fram tillögur og greiða atkvæði. Við afgreiðslu mála á aðalfundi ræður einfaldur meirihluti greiddra atkvæða úrslitum, nema annað sé sérstaklega ákveðið í lögum eða reglum deildarinnar.

8. gr. Stjórn
Stjórn skal skipuð fimm félagsmönnum, kjörnum á aðalfundi, til tveggja ára í senn. Formaður er kosinn sérstaklega en aðrir stjórnarmeðlimir skipta með sér hlutverkum gjaldkera, ritara og meðstjórnenda. Heimilt er að kjósa tvo varamenn í stjórn. Ef fleiri en einn félagsmaður býður sig fram til sama embættis skal kosning vera skrifleg og leynileg. Sé kosið á staðfundi skal kosning fara fram með skriflegum atkvæðaseðlum. Sé kosið á fjarfundi eða blönduðum fundi skal kosning fara fram með rafrænum hætti sem tryggir leynd atkvæða, örugga auðkenningu kjósenda og áreiðanlega talningu atkvæða. Sá telst kjörinn sem hlýtur meirihluta greiddra atkvæða. Kjöri skal þannig háttað að aldrei gangi fleiri en þrír kjörnir stjórnendur auk varamanna úr stjórn hverju sinni. Stjórn deildarinnar skal endurspegla fjölbreytileika og víðtæka reynslu erlendra hjúkrunarfræðinga á Íslandi. Stjórninni er heimilt að skipa nefndir eftir þörfum, svo sem á sviði menntunar, aðlögunar, námskeiðs eða rannsókna.

9. gr. Dagskrá aðalfundar
Að loknum hefðbundnum aðalfundarstörfum er heimilt að bjóða upp á fræðsluerindi.

Dagskrá aðalfundar skal vera sem hér segir:

- Kosning fundarstjóra og fundarritara

- Skýrsla stjórnar lögð fram

- Ársreikningar lagðir fram til samþykktar

- Reglubreytingar

- Ákvörðun félagsgjalds

- Kosning stjórnar

- Kosning tveggja skoðunarmanna reikninga

- Önnur mál

10. gr. Félagsgjald

Ákvörðun um félagsgjald skal tekin á aðalfundi og endurskoðuð árlega. Félagsgjald fyrsta starfsári deildarinnar vera 2.500 krónur og skulu engir styrkir greiddir á því tímabili. Félagar með lífeyrisaðild eru undanþegnir greiðslu félagsgjalds.

11. gr. Slit deildar
Ákvörðun um slit deildarinnar skal taka á aðalfundi með ¾ hlutum greiddra atkvæða og renna eignir deildarinnar til Félags íslenskra hjúkrunarfræðinga. Skili deildin ekki ársskýrslu til stjórnar Félags íslenskra hjúkrunarfræðinga tvö ár í röð getur aðalfundur félagsins tekið ákvörðun um slit deildarinnar.