Félag íslenskra hjúkrunarfræðinga, BSRB og Kennarasamband Íslands standa nú fyrir herferð gegn fyrirhuguðu afnámi áminningarskyldu á íslenskum vinnumarkaði. Afnám áminningarskyldu felur í sér eina stærstu réttindaskerðingu sem ráðist hefur verið í gagnvart opinberu starfsfólki.

Áratugagömul vörn gegn óréttlæti

Áminningarskyldan hefur frá 1954 þjónað því hlutverki að tryggja vandaða, faglega og sanngjarna málsmeðferð í starfsmannamálum.  Stuðla að því að stjórnendur taki upplýsta og málefnalega ákvörðun um uppsögn en ekki ákvörðun byggða á geðþótta eða misbeitingu valds. Þannig er hún vörn gegn óréttlæti, klíkumyndun og ógnarstjórnun.  

Áminningarskyldan er ekki skjól fyrir slæma frammistöðu heldur er markmið hennar að tryggja sanngirni. Það er lágmark að ekki sé hægt að segja fólki upp nema því hafi áður verið gefið tækifæri til að bæta ráð sitt. Sambærilegar reglur gilda á bæði almennum og opinberum vinnumarkaði á hinum Norðurlöndunum og eru hluti af eðlilegri vernd gegn óréttlæti. Afnám yrði gríðarleg afturför.

Engin lausn að afnema áminningarskyldu

Undanfarin ár hafa stéttarfélög orðið vör við aukna hörku og minni þekkingu stjórnenda á réttindum starfsfólks í starfsmannamálum. Í stað þess að bæta þekkingu og verklag virðist lausnin nú felast í því að fella reglurnar sjálfar úr gildi.  

Þeir sem hafa talað fyrir þessum breytingum hafa hagsmuni stjórnenda og atvinnurekenda að leiðarljósi, ekki starfsfólks.  Í opinberri umræðu hefur því verið haldið fram að áminningarskyldan sé ósanngjörn þar sem áminningarskyldan sé ekki í gildi á almennum vinnumarkaði, ef tilgangurinn er að tryggja að allir á vinnumarkaði séu með sömu réttindi er eðlilegra að tryggja að allt starfsfólk á vinnumarkaði hefði slíkt ráðningaröryggi. 

Því er haldið fram að um mannauðsstjórnunarmál sé að ræða. Í ljósi mikils álags í störfum framlínufólks og víða í stjórnsýslunni, skorts á starfsfólki, aukinnar starfsmannaveltu og veikinda er slíkt sjónarmið ekki trúverðugt. Afnám áminningarskyldu eykur starfsóöryggi allra. Rannsóknir sýna að óöryggi í starfi hefur neikvæð áhrif á starfsánægju, hollustu við vinnustað, streitu, afköst og starfsmannaveltu.  

Frumvarpið verði dregið til baka

Með herferðinni krefst Félag íslenskra hjúkrunarfræðinga, BSRB og Kennarasamband Íslands þess að frumvarpið verði dregið til baka. Það er löngu tímabært að stjórnvöld beini kröftum sínum að því að bæta starfsaðstæður, draga úr álagi og tryggja að hið opinbera geti laðað að og haldið í hæft starfsfólk.

Nú er tímabært að styrkja ráðningarvernd launafólks almennt og færa íslenskan vinnumarkað nær því sem þekkist á hinum Norðurlöndunum.

Við hvetjum alla hjúkrunarfræðinga til að taka þátt - deila myndböndum úr herferðinni, ræða málið við samstarfsfólk, stjórnendur og alþingismenn og láta í ljós þína afstöðu.  

Stöndum saman!