Útgáfa skýrslunar er í kjölfar umfangsmikillar könnunar á stöðu háskólamenntaðs fólks á húsnæðismarkaði. Könnunin var unnin af Félagsvísindastofnun Háskóla Íslands fyrir BHM, Byggingarfræðingafélag Íslands, Félag íslenskra hjúkrunarfræðinga, Lyfjafræðingafélag Íslands, Læknafélag Íslands, Stéttarfélag tölvunarfræðinga og Verkfræðingafélag Íslands. Alls bárust svör frá 5.799 félagsmönnum ofangreindra félaga og voru niðurstöður vigtaðar eftir aldri til að endurspegla þýðið sem best.
Fundurinn hófst með kynningu á niðurstöðum könnunarinnar og fóru Inga Rún Sæmundsdóttir og Rebekka Víðisdóttir frá Félagsvísindastofnun Háskóla Íslands yfir helstu niðurstöður.
Meðal þess sem fram kom í könnuninni og er birt í skýrslunni er að þrátt fyrir að stór hluti hópsins, um 75% búi í eigin húsnæði, eigi hluti hópsins erfitt með að standa undir mánaðarlegum húsnæðiskostnaði. Skýr munur birtist einnig á þeim sem eru að greiða af námslánum, en verulega stærri hluti þess hóps á erfitt með að standa undir húsnæðiskostnaði.
Fram kemur að yngra háskólafólk reiði sig í mjög auknum mæli á fjárhagsaðstoð frá fjölskyldu eða vinum til að komast inn á fasteignamarkað.
Að lokum vekur það athygli að háskólamenntaðir vinna mikið, en rúmlega þriðjungur hópsins var í meira en 100% heildarstarfshlutfalli. Þrátt fyrir það mátti greina þunga greiðslubyrði hjá hluta hópsins.
Finna má hlekk á skýrslu Félagsvísindastofnunar um stöðu háskólafólks á húsnæðismarkaði hér að neðan.
Í kjölfar kynningar á könnuninni tók til máls Brynhildur Heiðar- og Ómarsdóttir, formaður Visku, og kynnti þar bæði niðurstöður könnunar sem Viska hafði staðið fyrir um hug félagsfólks til óhagnaðardrifins leigufélags. Í ljós kom talsverður áhugi á úrræðinu sem var kynnt nánar í erindi Brynhildar.
Fundinum lauk með pallborðsumræðum út frá erindum morgunsins, en pallborðið sátu Dagur B. Eggertsson, þingmaður Samfylkingar, Helga Rósa Másdóttir, formaður Fíh og Erlendur Örn Fjelsted úr stjórn VFÍ. Pallborðinu stjórnaði Kolbrún Halldórsdóttir, formaður BHM.
Helsta athygli fengu íþyngjandi þáttur námslána á getu til að standa undir húsnæðiskostnaði hjá hópnum, sem greina má í könnuninni. Rætt var um breytingar á lánafyrirkomulagi sem hafa verið í farvatninu um þó nokkurt skeið. Eins var rætt um möguleikann sem óhagnaðardrifin leigufélög gætu falið í sér fyrir hópinn og svo félagslegan jöfnuð og jöfn tækifæri fyrir einstaklinga til að komast á húsnæðismarkað, en könnunin ber með sér að viðsnúningur hafi orðið á síðustu 10 árum og fólk reiði sig í auknum mæli á stuðning fjölskyldu og vina til að komast inn á húsnæðismarkaðinn.