Í skýrslunni eru færðar til bókar 2.546 skelfilegar árásir sem beinast gagngert að heilbrigðisþjónustuaðilum, þar með talið 455 heilbrigðisstarfsfólk sem hefur verið myrt, 218 rænt og 263 tekin höndum. Þá eru taldar upp 790 árásir, skemmdarverk eða eyðilegging á heilbrigðisstofnunum. Alþjóðaráðið fordæmir alvarlega þá óverjandi stöðu að heilbrigðisstarfsfólk sé gert að skotmörkum í vopnuðum átökum og lýsir sérstaklega yfir áhyggjum af aukningu mannrána á heilbrigðisstarfsfólki sem greina má nýlega.

Forseti alþjóðaráðs hjúkrunarfræðinga, José Luis Cobos Serrano, fordæmdi hvernig skelfilegt ofbeldi gegn heilbrigðisstarfsfólki hefur verið gert hversdagslegt og krafðist aðgerða og ábyrgðar:

„Hjúkrunarfræðingar taka mikla persónulega áhættu við að fara inn á átakasvæði en færa með sér von, líkn og vernd. Þessi skýrsla lýsir því svo hvernig þessir sömu aðilar mæta óásættanlegu ofbeldi.“

„Þetta getur ekki haldið áfram. Enginn hjúkrunarfræðingur ætti að vera skotmark. Við munum aldrei hætta að kalla eftir því að árásir hætti, að ábyrgð sé sýnd í verki og að hver einasti hjúkrunarfræðingur, heilbrigðisstarfsmaður og sjúklingur njóti verndar.“

Í ár eru tíu ár liðin frá því að Öryggisráð SÞ samþykkti tillögu 2286 sem ítrekar skuldbindingar ríkja gagnvart alþjóðalögum um að vernda heilbrigðisstarfsfólk, sjúklinga, stofnanir og sjúkraflutninga. Því miður hefur á sama tíma orðið stigmögnun á árásum og má tala um niðurbrot á þessum sömu samþykktum.

Alþjóðaráðið kallar eftir því að:

• Árásir á heilbrigðisstarfsfólk og stofnanir hætti umsvifalaust
• Ábyrgð sé tekin á ástandinu með sjálfstæðum rannsóknum á öllum árásum og að alþjóðalög séu virt.
• Heilbrigðisstarfsfólk sé varið og valdeflt á átakasvæðum og sé sérstaklega varið fyrir öllu ofbeldi
• Aðildarlönd SÞ skili inn upplýsingum um árásir á heilbrigðisþjónustu skv. samþykkt Öryggisráðs SÞ 2286
• Gögn um árásir séu stöðluð og samhæfð
• Fjármagn sé tryggt til mannúðarstarfs svo hægt sé að tryggja öryggi starfsfólks og áframhaldandi ummönnun á átakasvæðum.