Helstu niðurstöður kjarakönnunar 2022
Meirihluti hjúkrunarfræðinga er óánægður með launakjör sín samkvæmt niðurstöðum kjarakönnunar sem gerð var í haust. Þrátt fyrir það eru flestir ánægðir í starfi.
Kjarakönnun Félags íslenskra hjúkrunarfræðinga var lögð fyrir í september síðastliðnum og liggja niðurstöðurnar nú fyrir. Markmið kjarakönnunarinnar var að kanna viðhorf og væntingar hjúkrunarfræðinga fyrir næstu kjarasamninga. Svarhlutfall í könnuninni var mjög gott, eða 64,2%. Þessar helstu niðurstöður könnunarinnar voru fyrst kynntar á kjararáðstefnu Fíh í byrjun október og birtar í Tímariti hjúkrunarfræðinga.
Þegar niðurstöðurnar eru bornar saman við niðurstöður könnunar Fíh frá 2020 kemur í ljós að ánægja í starfi fer minnkandi og óánægja með launakjör fer vaxandi.
![](/_next/image?url=https%3A%2F%2Fimages.prismic.io%2Fhjukrun%2F4c7e009d-d3d9-4f87-85b5-491c34959ed7_%25C3%25A1n%25C3%25A6gja%2B2022.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1067%26h%3D800&w=3840&q=80)
Alls sögðust 69% hjúkrunarfræðinga vera ánægð í starfi þegar á heildina er litið, 18,4% mjög ánægð í starfi og rúmur helmingur fremur ánægður. Aðeins 1,6% eru mjög óánægðir í starfi og 6,5% fremur óánægðir. Munurinn er lítill þegar litið er til bakgrunnsbreytna á borð við kyn og aldur.
Óánægja með launakjör
Meirihluti hjúkrunarfræðinga sem svaraði könnuninni, eða 58,8%, er óánægður með launakjör sín, samanborið við 14,2% sem eru ánægðir eða fremur ánægðir. Aðeins 2,4% eru mjög ánægðir með launakjörin.
![](/_next/image?url=https%3A%2F%2Fimages.prismic.io%2Fhjukrun%2Fc6160ed2-2b7a-434c-abaf-107f943bb0f3_Launakj%25C3%25B6r%2B2022_lit.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1600%26h%3D1200&w=3840&q=80)
Fíh gerði könnun árið 2019 í aðdraganda kjarasamninga, niðurstöður þeirrar könnunar eru að miklu leyti sambærilegar og þessi. Í þeim niðurstöðum voru 10,6% hjúkrunarfræðinga ánægðir eða fremur ánægðir með launakjör sín og 55,9% óánægður.
![](/_next/image?url=https%3A%2F%2Fimages.prismic.io%2Fhjukrun%2F9bf0c3c4-b401-4dcd-85e3-fb724929a944_launakj%25C3%25B6r%2B%25C3%25A1ri%25C3%25B0%2B2019.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1600%26h%3D1200&w=3840&q=80)
Svipað hlutfall svaraði því til að það skipti þá miklu máli eða litlu máli að hafa möguleika á yfirvinnu. Hins vegar vegur möguleiki á yfirvinnu mun þyngra í yngri aldurshópi, þar sem ríflega helmingur telur það skipta miklu máli samanborið við um 19% í aldurshópnum 60 ára og eldri. Spurt var hvaða atriði eigi helst að ákvarða endanlega launasetningu hjúkrunarfræðinga á stofnunum, en starfslýsing, menntun og miðlægur kjarasamningur vógu þar þyngst.
Langflestir, eða 96,9%, telja hækkun grunnlauna vera mikilvægt áhersluatriði við gerð næstu kjarasamninga, 88,9% telja það mikilvægasta atriðið, 44,4% nefndu hærri grunnlaun fyrir aukið starfshlutfall. Enginn marktækur munur er á aldri og öðrum bakgrunnsbreytum þegar kemur að þessu atriði. Þá telur 63% hjúkrunarfræðinga að grunnlaun almennra hjúkrunarfræðinga eigi að vera hærri en 800.000 kr. Þegar litið er til starfstengdra réttinda í komandi kjarasamningum nefndu 73,4% mönnunarviðmið í heilbrigðisþjónustu, þar á eftir kom bætt vinnuaðstaða og öryggi á vinnustað.
Margir íhugað að hætta í starfi
Meira en helmingur, eða 66,8% hjúkrunarfræðinga hefur íhugað af alvöru að hætta í starfi á síðustu tveimur árum. En 33,2% hafa ekki íhugað það.
![](/_next/image?url=https%3A%2F%2Fimages.prismic.io%2Fhjukrun%2F6efd03f6-e240-4032-af62-c23406a36705_h%25C3%25A6tta%2B%25C3%25AD%2Bstarfi.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D800%26h%3D600&w=1920&q=80)
Í könnun kjarasviðs fyrir tveimur árum var spurt hvort hjúkrunarfræðingar hefðu hugsað um að hætta undanfarið ár, þá kom í ljós að rúmur helmingur hefði oft eða stundum íhugað að hætta.
![](/_next/image?url=https%3A%2F%2Fimages.prismic.io%2Fhjukrun%2F7ddb583d-3354-4de1-b172-e4bd9e747806_H%25C3%25A6tta_2020.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D1067%26h%3D800&w=3840&q=80)
Þegar litið er til ástæðna segja 42% þeirra sem hafa af alvöru íhugað að hætta það vera vegna starfstengds álags, 33,7% sögðu það vegna launakjara, 11,1% sagði það vera vegna stjórnunarhátta á vinnustað og 5,9% vegna ógnunar við öryggi sitt og/eða skjólstæðinga sinna.
![](/_next/image?url=https%3A%2F%2Fimages.prismic.io%2Fhjukrun%2F825406a8-fe40-4b08-8b20-eeafab80a742_%25C3%25A1st%25C3%25A6%25C3%25B0ur_lit.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D800%26h%3D600&w=1920&q=80)
Ekki næg mönnun til að tryggja lágmarksöryggi
Helmingur hjúkrunarfræðinga hefur oft mætt til vinnu við aðstæður þar sem mönnun var ekki næg til að tryggja lágmarksöryggi skjólstæðinga. Aðeins 7,3% sögðust aldrei hafa mætt við slíkar aðstæður, 14,7% sögðu það gerast sjaldan. Munurinn var nokkur þegar dagvinna var borin saman við vaktavinnu, 31,3% í vaktavinnu sögðu það gerast mjög oft samanborið við 20,8% í dagvinnu.
![](/_next/image?url=https%3A%2F%2Fimages.prismic.io%2Fhjukrun%2F508bb6e9-007a-4f9e-ad1d-4626d84f845b_%25C3%25B6ryggi_lit.jpg%3Fauto%3Dformat%26crop%3Dfaces%252Cedges%26fit%3Dcrop%26w%3D800%26h%3D600&w=1920&q=80)
Fleiri sögðu styttingu vinnuvikunnar hafa gengið vel á sínum vinnustað en illa, 43% á móti 25%. Þá sögðu 32% styttinguna hafa gengið í meðallagi vel. Starfsfólk Reykjavíkurborgar var ánægðara en starfsmenn ríkisins, 53% samanborið við 41,6%. Munurinn er svipaður þegar litið er til dagvinnu og vaktavinnu, 54,2% hjúkrunarfræðinga í dagvinnu telur styttinguna hafa gengið vel samanborið við 31,6% í vaktavinnu.
Þegar beðið var um persónulegt mat á styttingu vinnuvikunnar sagði meirihluti, 55%, styttinguna hafa gengið vel fyrir sig sjálfa/n á móti 20% sem er óánægður. Töluvert fleiri hjúkrunarfræðingar í dagvinnu eru ánægðir með styttinguna fyrir sjálfan sig, eða 71,2% á móti 41,7% í vaktavinnu. Ánægjan er áberandi meiri hjá þeim sem eru í 100 prósent starfi, þar eru 61,3% ánægð. Ánægjan fer einnig vaxandi með auknum starfsaldri, 61,1% í elsta aldurshópnum samanborið við 46,4% í yngsta aldurshópnum.