Kafli I – Nafn deildar og tilgangur 

1 gr. Nafn 
Nafn deildar er Fagdeild svefnhjúkrunar innan Félags íslenskra hjúkrunarfræðinga 

2.gr. Tilgangur 
Tilgangur deildarinnar er að auka þekkingu hjúkrunarfræðinga á svefni og svefnhjúkrun, sem felur í sér forvarnir, fræðslu, meðferð svefnvanda og eflingu svefnheilsu. Til að styrkja hjúkrunarfræðinga sem meðferðaraðila í tengslum við svefn.  

Markmið Fagdeildar svefnhjúkrunar eru að: 

• Efla fræðslu og rannsóknir innan hjúkrunar á svefni 
• Þróa svefnhjúkrun sem fræðigrein 
• Að vera stjórn Félags íslenskra hjúkrunarfræðinga og nefndum til ráðgjafar um svefnhjúkrun 

Deildin heyrir undir fagsvið Félags íslenskra hjúkrunarfræðinga. 

Kafli II – Aðild 

3. gr. Aðild 
Rétt til aðildar að deildinni eiga hjúkrunarfræðingar í Félagi íslenskra hjúkrunarfræðinga sem hafa áhuga á svefni og/eða vinna við svefn (rannsóknir, kennsla, meðferð)  

4. gr. Umsókn um aðild 
Umsókn um aðild að deildinni skal berast til stjórnar deildarinnar. 

5. gr. Úrsögn 
Úrsögn úr deildinni er hægt að skila skriflega til stjórnar. Einnig getur stjórn litið á það sem úrsögn ef félagsmaður hefur ekki greitt árgjald deildarinnar tvö ár í röð. 

Kafli III – Skipulag deildar 

6. gr. Lög 
Deildin heyrir undir Félag íslenskra hjúkrunarfræðinga og lög félagsins eru lög deildarinnar. 

7. gr. Aðalfundur 
Aðalfundur hefur æðsta vald í málefnum deildarinnar. Aðalfund skal halda ár hvert og skal til hans boða með að minnsta kosti tveggja vikna fyrirvara með sannarlegum hætti. Aðalfundur telst löglegur sé rétt til hans boðað. Einfaldur meirihluti mættra félagsmanna ræður úrslitum mála. 

8. gr. Stjórn 
Stjórn deildarinnar skal skipuð fimm félagsmönnum, kjörnum á aðalfundi, til tveggja ára í senn. Formaður er kosinn sérstaklega en aðrir stjórnarmeðlimir skipta með sér hlutverkum gjaldkera, ritara og tveggja meðstjórnenda. Heimilt er að kjósa tvo varamenn í stjórn. Kosning skal vera skrifleg og leynileg ef fleiri en einn félagi býður sig fram til sama embættis. Meirihluti aðalfundar ræður kjöri. Kjöri skal þannig háttað að aldrei gangi fleiri en þrír kjörnir stjórnendur auk varamanna úr stjórn hverju sinni. 

9. gr. Dagskrá aðalfundar 
Dagskrá aðalfundar skal vera sem hér segir: 

- Kosning fundarstjóra og fundarritara 

- Skýrsla stjórnar lögð fram: Á ekki við, þar sem þetta er stofnfundur 

- Ársreikningar lagðir fram til samþykktar: Á ekki við, þar sem þetta er stofnfundur 

- Reglubreytingar: Kosið um starfsreglur fagdeildarinnar 

- Ákvörðun félagsgjalds 

- Kosning stjórnar 

- Kosning tveggja skoðunarmanna reikninga 

10. gr. Félagsgjald 

Ákvörðun um félagsgjald skal tekin á aðalfundi og endurskoðuð árlega. Byrjum með 2000kr. félagsgjald og greiðum ekki neina styrki fyrsta starfsár deildarinnar. Félagar með lífeyrisaðild greiða ekki félagsgjöld. 

11. gr. Slit deildar 
Ákvörðun um slit deildarinnar skal taka á aðalfundi með ¾ hlutum greiddra atkvæða og renna eignir deildarinnar til Félags íslenskra hjúkrunarfræðinga. Skili deildin ekki ársskýrslu til stjórnar Félags íslenskra hjúkrunarfræðinga tvö ár í röð getur aðalfundur félagsins tekið ákvörðun um slit deildarinnar. 

Kafli IV – Ársskýrsla, reikningar og endurskoðun 

12. gr. Ársskýrsla 
Deildin skal skila skýrslu um starfsemi sína til sviðsstjóra fagsviðs Félags íslenskra hjúkrunarfræðinga fyrir lok marsmánaðar ár hvert. 

13. gr. Reikningar og endurskoðun 
Reikningstímabil deildar skal miðast við aðalfund ár hvert. Á aðalfundi skal kjósa tvo skoðunarmenn reikninga úr röðum félagsmanna. 

Kafli VI – Gildistaka 

14. gr. Gildistaka 
Starfsreglur þessar öðlast gildi þegar þær hafa verið samþykktar á sérstaklega boðuðum stofnfundi deildarinnar. Klappað var fyrir stofnun deildarinnar.